A Deputación de Pontevedra incrementa nun 30% os recursos destinados a Promoción Económica e Fomento do Emprego, que ascenden no 2026 a máis de 3,7 millóns de euros. A vicepresidenta provincial e deputada delegada de Promoción Económica e Fomento do Emprego, Luisa Sánchez, remarcou que este incremento “responde á nosa vontade de liderar proxectos para que esta provincia siga a ser o motor económico, de innovación e de emprego de Galicia”.

Sánchez subliñou que ademais de incrementar os recursos no 2026 lanzaranse dúas novas liñas de axudas: unha para a promoción de actividades empresariais a través de eventos, dotada con 135.000 euros, e outra para o impulso do tecido empresarial a través de actividades de formación, dotada con 100.000 euros. Tamén se incrementará en preto de 800.000 euros as partidas destinadas aos programas +Emprega en Centros Especiais de Emprego e +Emprega nos Concellos, e en máis de 20.000 o programa de fomento do emprendemento no ensino DepoEmprende.

Desde o ano 2023 e co orzamento aprobado para o vindeiro ano, a vicepresidenta subliñou que serán preto de 13 millóns de euros os recursos dirixidos polo goberno da Deputación de Pontevedra á promoción económica e ao fomento do emprego. Neste eido, recordou que con estes recursos se impulsaron programas para fomentar a mobilidade internacional da mocidade, iniciativas para promover o emprego nos concellos, plans de capacitación tecnolóxica de pemes, proxectos de revitalización do pequeno comercio no rural, programas de crecemento empresarial e emprendemento nos Viveiros de Empresas de Barro e Lalín ou iniciativas de fomento da cultura emprendedora como DepoEmprende na Escola, na ESO e na FP.