Os campamentos de Depo Aventura A Lanzada reunirán na súa terceira quenda a partir deste domingo 9 de xullo a 140 nenas e nenos de 35 concellos da provincia. Ao longo de sete días desenvolverán múltiples actividades lúdicas e formativas para o seu enriquecemento persoal e tamén de coñecemento de lugares fóra da contorna habitual. Neste verán e ata o 9 de setembro, serán en total 1.540 menores de 58 concellos da provincia os que participen nas once quendas en que se dividen os campamentos.

Nesta terceira quenda de Depo Aventura A Lanzada participan 70 nenas e 70 nenos, todas e todos elas/eles nadas/os entre os anos 2010 e 2015. Proceden de Vigo (31); Vilagarcía (11); Nigrán (10); Pontevedra (9); O Porriño (7); Ponteareas (6); A Estrada (6); Vilanova de Arousa (6); A Cañiza (5); Salceda de Caselas (5); Mos (4); Lalín (3); Pazos de Borbén (3); A Illa de Arousa (3);Cangas (3); Marín (3); Tomiño (2); Oia (2); Redondela (2); A Guarda (2); Cerdedo-Cotobade (2); Meaño (2); Baiona (1); Caldas de Reis (1); Salvaterra (1); O Rosal (1); Sanxenxo (1); Portas (1); Poio (1); Arbo (1); Gondomar (1); Ribadumia (1); Cuntis (1); Ponte Caldelas (1) e Tui (1).

Ao longo do campamento, a Deputación ofrécelles ás nenas e nenos un programa de actividades baixo o nome “A Lanzada, un paseo pola historia”, destinado a favorecer a igualdade de xénero, a inclusión, a aprendizaxe da lingua inglesa, a arte, a cultura, a ciencia, o deporte, a inclusión, a lingua de signos, o respecto e o coñecemento da natureza e a dinamización e coñecemento multicultural da contorna. Amais, as e os nenos realizarán o tradicional obradoiro para elixir a mascota oficial deste programa provincial e, entre as moitas iniciativas programadas no marco de Depo Aventura 2023, inclúese unha visita á Illa de Ons e unha segunda excursión relacionada coa natureza e o coidado do medio ambiente.