A Xunta de Goberno da Deputación de Pontevedra acaba de aprobar novas achegas por valor de máis de 1,1 millóns de euros do II Plan Extraordinario de Infraestruturas Deportivas para que Gondomar, Marín, Moaña, Moraña, Mos, Pontecesures, Poio e O Porriño realicen melloras en diferentes equipamentos deportivos. Como explicou o vicepresidente da institución provincial, Rafa Domínguez, "cos 8 millóns de euros deste plan, o dobre que na pasada edición, continuamos modernizando os equipamentos deportivos do conxunto da provincia como nunca antes se fixera".

En concreto, o Concello de Pontecesures recibe 94.484 euros para as obras de mellora do pavillón polideportivo municipal, unha achega coa que renovará a pista multideportiva completamente, substituiranse varandas e mellorarase a zona debaixo das gradas; Marín contará con 99.644 € para a instalación de climatización e a substitución da deshumectadora na piscina municipal; Moraña recibirá 100.966 € para construír unha pista deportiva circular para a práctica do atletismo na contorna do campo de fútbol de Mirallos, e Poio 135.457 euros para o proxecto de creación dunha pista multideporte para a práctica de fútbol sala, balonmán ou baloncesto na área recreativa de Vilariño.

Ademais, Gondomar contará con 156.427 euros para a mellora da eficiencia enerxética da iluminación deportiva dos campos de fútbol das Cercas e as Gaiandas coa instalación de novas luminarias led; Mos mellorará as instalacións no complexo deportivo Óscar Pereiro grazas a unha achega de 169.876 €; Moaña recibirá 196.556 € para o proxecto de mellora do pavillón do Rosal, e O Porriño contará con 204.404 euros para o acondicionamento exterior da contorna do seu complexo deportivo, con intervencións nas zonas de aparcamento, dotando novos espazos axardinados e unha nova cuberta para as pistas de pádel.

videos

audios