Almudena Sánchez

 (Andratx, Mallorca, 1985). Xornalista e cun mestrado en Escritura Creativa.

La acústica de los iglús (Cabalo de Troya, 2016) foi o seu primeiro libro de relatos, que xa alcanzou a oitava edición e se publicou tamén en Arxentina (Odelia Editora, 2018). Ademais, o seu debut serviulle para ser finalista do Premio Setenil e para que o seu libro figurase entre os favoritos da plataforma New Spanish Books. Algúns dos seus contos foron traducidos ao inglés e publicáronse na revista Two Lines.

En 2013 foi incluída en Bajo 30, antología de nuevos narradores españoles (Salto de Página) e en 2019 foi seleccionada entre as e os dez mellores escritores trintaneiros de España pola Axencia Española de Cooperación Internacional para o Desenvolvemento (AECID), xunto a autoras coma Cristina Morales ou Aroa Moreno.

Fármaco (2021, Literatura Random House) é o seu último libro, un testemuño sobre a depresión escrito sen tabús, con humor e proximidade por unha das voces máis especiais da súa xeración.

Twitter: @AlmudenaS85
IG: almudenasanchezz

Ana Pardo de Vera

(Lugo, 1974). Licenciada en Filoloxía Hispánica, cun mestrado en Medios de Comunicación e estudos de Ciencias Políticas e Socioloxía pola UNED.

Durante a súa etapa profesional traballou como correspondente política, ademais de colaborar con varias radios e televisións, coma Telecinco, Onda Cero, Cuatro, Telemadrid e EITB.
En 2007 participou na fundación do diario Público e asumiu a súa dirección en 2016. Desde 2016 ata 2019 dirixiu a edición dixital deste xornal, do que actualmente é directora corporativa e de relacións institucionais.
Traballou en medios locais (diario Sur de Málaga), autonómicos (La Voz de Galicia) ou nacionais (Diario 16, Tiempo ou El Siglo), entre outros, e foi asesora de comunicación en varios ministerios durante a etapa do Goberno de Zapatero: Defensa; Industria, Enerxía e Turismo; e Vicepresidencia de Política Territorial.
É autora do libro En la maleta de Zapatero (Libros.com), sobre as súas viaxes co expresidente e a política exterior do PSOE neses anos.
O seu último libro é La armadura del Rey (Roca Editorial, 2022) xunto a Albert Calatrava e Eider Hurtado.

Twitter: @pardodevera
IG: anapardodevera

Ángeles Caballero

(Madrid). Xornalista que se serve do humor para tentar ver as cousas doutra maneira: con lixeireza, que non frivolidade, aínda que a reivindica.

Pariu dous nenos e tres medios —¡Qué!, elEconomista e Ctxt—, pero só o primeiro o fixo soa. Tamén traballou en ABC e Actualidad Económica e, polo camiño, gañou un par de premios: un por escribir sobre Rodrigo Rato, o que lle permitiu pasar pola Universidade de Columbia (xúranos que era Manhattan, non Aravaca), o outro baixo a tapa dun iogur de fresa.

Unha vez dixo que quería ser a Lina Morgan do século xxi. Está niso, pero non lle pagan tanto como para comprar un teatro en La Latina.

Actualmente escribe, opina e fai o que pode en El Confidencial, Onda Cero, La Sexta e Canal 24 Horas.

Artigos en El Confidencial: https://www.elconfidencial.com/autores/angeles-caballero-2085/

Twitter: @macaballeroma

Carolina Sertal

(Redondela, 1989). Xornalista.

Tras facer prácticas en medios de comunicación de Vigo, Santiago de Compostela e Pontevedra, comezou a súa traxectoria profesional en 2012 cun contrato de substitución en Diario de Pontevedra. Cubrindo baixa tras baixa, continuou neste xornal ata 2016, cando se incorporou a un gabinete de prensa institucional no que traballou ata 2019. En setembro dese mesmo ano volveu ás redaccións como parte da delegación de Faro de Vigo e, despois dun ERTE a raíz da pandemia, finalizou o seu contrato temporal.

Ao pouco tempo chamárona para unha substitución na delegación de La Voz de Galicia en Pontevedra e, tras varios meses de desemprego, en xullo de 2021 volveu a Faro de Vigo, tamén en Pontevedra. En novembro dese ano pasou a formar parte da sección local deste medio en Vigo, para cubrir outra baixa. Actualmente, continúa nesa mesma redacción e compatibiliza o traballo na sección web coa local. Tamén se encargou da área de prensa para o Festival Nacional de Curtametraxes Redondela en Curto durante catro anos.

Ademais da súa faceta xornalística, escribe poesía e, en 2018, acadou o máximo galardón nos Premios Provinciais á Xuventude da Deputación de Pontevedra por Anguria, un poema no que aborda a saúde mental e que máis tarde lle daría título ao seu primeiro poemario, editado a finais de 2019. En 2020 acadou o segundo premio no mesmo certame por Estatuas de sal, unha peza sobre a repercusión da pandemia nunha xeración tan castigada e precarizada coma a súa.

Previamente, en 2014, foi galardoada cun segundo premio no certame de microrrelato Mulleres Progresistas de Vigo por Dsineb, un relato sobre a crúa realidade das mulleres marroquís e a súa explotación no sector téxtil.

Twitter: @SertalC

** Foto: Beatriz Ciscar

Diana López Varela

(Pontevedra, 1986). Xornalista e guionista.

Escribiu e coescribiu diferentes proxectos para cinema, televisión e teatro. En 2015 estreou a súa primeira obra teatral, Non é país para conas, e en 2018 dirixiu a súa primeira curtametraxe, Feminazi, unha parodia sobre o machismo.

Como columnista, colaborou con Jot Down, Diario de Pontevedra, El Nacional.cat ou Revista Luzes. En 2016 publicou o seu primeiro libro, No es país para coños, e en 2019 o segundo, Maternofobia (Ediciones Península), un retrato dunha xeración enfrontada á maternidade; en 2021 colaborou na antoloxía Voces que cuentan (Planeta Cómic).

En 2022 escribe e dirixe o monólogo A síndrome de Lis e é corresponsable do congreso de mulleres comunicadoras As Mulleres que Opinan Son Perigosas. Actualmente colabora en Público.

IG: diana.lovar

Inma López Silva

(Santiago de Compostela, 1978). Escritora, crítica teatral e columnista en La Voz de Galicia.

Na universidade da súa cidade natal licenciouse e doutorouse en Filoloxía. Diplomada en Estudos Teatrais pola Universidade Sorbona Nueva, actualmente combina a actividade literaria coa docencia na Escola Superior de Arte Dramática de Galicia, onde imparte Teorías do Teatro e desde onde desenvolve unha intensa actividade crítica.

É autora dunha ampla obra literaria que foi recoñecida cos principais premios da literatura galega. Como narradora cultivou o xénero breve en libros coma Rosas, corvos e cancións (2000) ou Tinta (2012), así como o ensaio feminista en New York, New York (2007), Maternosofía (2013) e Chámame señora, pero trátame coma a un señor (2018).

Tras o éxito de novelas coma Memoria de cidades sen luz (2007, Premio Blanco Amor, Premio San Clemente, Premio da AELG) e Aqueles días en que eramos malas (2016, Premio Lousada Diéguez, finalista do premio El Ojo Crítico), a súa novela más recente é O libro da filla.

É a última gañadora da 34.ª edición do premio de poesía Eusebio Lorenzo Baleirón, que convoca o Concello de Dodro, coa súa obra Clepsidras.

Web: www.inmalopezsilva.com

Joana Bonet

(1966, Vinaixa, Lleida). Xornalista e escritora.

Actualmente colabora en radio e escribe en La Vanguardia, Vanity Fair e no diario arxentino Clarín.

Impulsou e dirixiu varias revistas, coma Woman, Marie Claire, ICON ou Fashion&Arts Magazine, e traballou cos principais medios de comunicación nacionais, escritos e audiovisuais.

Especializada en creación de novas cabeceiras e formatos editoriais, empezou a traballar para revistas con 26 anos; a súa primeira cabeceira foi Woman, en 1992, co lema "una mujer de emociones", na que incluíron política e ecoloxía por primeira vez no sector. En 1996 comezou a dirixir Marie Claire, na que modernizou a liña editorial durante 17 anos, e en 2013 promoveu a saída de ICON. Ademais, en Marie Claire impulsou os Premios da Moda Internacionais durante dez anos, que contaron coa asistencia de Alexander McQueen, Albert Elbaz ou Karl Lagerfeld, entre outros.

Entre os seus libros figuran Mi vida es mía (2000, con Anna Caballé), Hombres, material sensible (2003), Las metrosesenta (2007), Generación paréntesis (2013) e Fabulosas y rebeldes: cómo me hice mujer (2019).

O seu último libro é Chacón. La mujer que pudo gobernar (2022, Península).

Twitter: @bonetjoana

IG: joana_bonet

Web: http://www.joanabonet.com/

Julia Varela Ruano

(Pontevedra, 1981). Vive en Madrid e é xornalista en RTVE.

Actualmente dirixe e presenta o programa diario Tarde lo que tarde en Radio Nacional. Ademais, desde 2015 é a comentarista oficial de Televisión Española no Festival de Eurovisión.

A súa traxectoria profesional comezou como redactora en distintos suplementos do diario El Mundo e continuou como locutora en Radio Exterior e Radio Nacional de España. Formouse durante seis anos na emisora máis vangardista desta cadea, Radio 3. O salto á televisión fíxoa experimentar con distintos formatos, como reporteira no programa Comando actualidad, no programa matinal de La mañana de la 1 ouen emisións especiais dentro da área de Entretemento e Espectáculos de TVE.

¿Por qué me pido un gin-tonic si no me gusta? (Ediciones B, 2019) é a súa primeira novela.

Web do programa Tarde lo que tarde: https://www.rtve.es/play/audios/tarde-lo-que-tarde/

Twitter: @JuliaVarela__

IG: julia__varela

Luz Sánchez-Mellado

(Alacante, 1966), reporteira, entrevistadora e columnista en El País. Licenciada en Xornalismo pola Universidade Complutense de Madrid.

Comezou a colaborar no diario El País cando tiña 19 anos, mentres estudaba a licenciatura en Xornalismo. Durante dúas décadas escribiu reportaxes de temática social, relacións persoais e entrevistas con destacados personaxes da arte, da ciencia e da política.

Actualmente escribe a columna da última páxina dos xoves e a entrevista da contraportada dos domingos: “Gente con luz”.

En 2010 concedéronlle o premio xornalístico Forzas y Corpos de Seguridade do Estado, cuxa finalidade é promover e consolidar o papel dos medios de comunicación na transmisión e divulgación das actividades que desenvolve esta institución, e foi galardoada co Premio Nacional contra a Violencia de Xénero.

Autora de Ciudadano cortés e Estereotipas (Plaza y Janés), centra o seu interese na trastenda das tendencias sociais, culturais e políticas e no achegamento aos seus protagonistas.

Artigos en El País: https://elpais.com/autor/luz-sanchez-mellado/

Twitter: @luzsmellado

Mamen Mendizábal García

(Madrid, 1979) é xornalista e presentadora. Licenciada en Xornalismo pola Universidade Complutense de Madrid.

Iniciou a súa carreira profesional na Cadena Ser xunto a Iñaki Gabilondo no programa Hoy por hoy. En outubro de 2004 dá o salto a televisión para presentar en TVE o espazo de debate 59 segundos, á fronte do cal se mantería ata principios de 2006, cando a ficha a nova cadea de televisión La Sexta. Nesta canle comezou como presentadora da segunda edición de Noticias de La Sexta no ano 2006 e en 2008 foi enviada aos Estados Unidos para cubrir a vitoria de Barack Obama.

Desde 2012 ata 2021 liderou o programa diario de actualidade e análise Más vale tarde en La Sexta. Tamén presenta o programa de entrevistas Palo y astilla. En 2022 estreou Encuentros inesperados.

Recibiu a Antena de Ouro en 2013 por Más vale tarde, o Premio Ondasa Mellor Presentadora de Televisión en 2014 e o premio de televisión Salvador de Madariaga en 2016.

Web do programa Encuentros inesperados: https://www.lasexta.com/programas/encuentros-inesperados/

Twitter: @MamenMendi

IG: mamenmedi

Estefanía Molina Morales

(Igualada, 1991). Politóloga e xornalista.

Estudou o grao en Xornalismo e o grao en Ciencias Políticas e da Administración na Universidade Pompeu Fabra; foi primeira da súa promoción en ambos os graos, obtivo un premio extraordinario e logrou a bolsa Global Cities da Universidade de California (UCLA).

Iniciou a súa traxectoria como consultora en comunicación política e de asuntos públicos e desde 2015 traballa como cronista parlamentaria no Congreso e no Senado informando sobre a situación dos partidos e do Goberno. É columnista en El País e analista política na Cadena SER, no Canal 24 Horas de TVE, na TV3 e en La Sexta.

É autora do libro El berrinche político (2015-2020). Los años que sacudieron la democracia española (Destino, 2021).

Artigos en El País: https://elpais.com/autor/estefania-molina-morales/

Twitter: @EstefMolina_

IG: estefmolina_

Fernanda Tabarés

(Ourense, 1968). Xornalista. Actualmente é directora de Voz Audiovisual.

Licenciouse en Ciencias da Información pola Universidade Complutense de Madrid. Leva máis de vinte anos vinculada á Corporación Voz, na que desempeñou diversas responsabilidades xornalísticas e de xestión.

Iniciou a súa carreira profesional en La Voz de Galicia, en 1990. Foi delegada do xornal no Ribeiro-O Carballiño, redactora xefa no desaparecido Diario 16, xefa da sección de Sociedade e Cultura de La Voz de Galicia e delegada do xornal en Vigo.

Asumiu a dirección de V Televisión entre os anos 2011 e 2016, na que, ademais, presentaba o programa Vía V. Polo seu traballo neste desaparecido programa de debate e faladoiro gañou o premio Mestre Mateo á mellor comunicadora de televisión en 2013.

Ademais de dirixir a produtora Voz Audiovisual, publica unha columna de opinión na última páxina de La Voz de Galicia.

Columnas en La Voz de Galicia: https://www.lavozdegalicia.es/firmas/fernanda-tabares

Twitter: @ftabara

Margaryta Yakovenko

(Tokmak, Ucraína, 1992) é xornalista e escritora.

Estudou xornalismo na Universidade de Murcia e realizou o mestrado de Xornalismo Político Internacional da Universidade Pompeu Fabra.

Trasladouse a unha aldeíña da costa de Murcia aos sete anos. É xornalista especializada en Política Internacional, en concreto, na Unión Europea e nos países exsoviéticos. Foi editora na revista PlayGround e redactora en El Periódico de Cataluña e La Opinión. Actualmente traballa en El País.

Publicou o conto "No queda tanto", que forma parte da antoloxía Cuadernos de Medusa, de la editorial Amor de Madre. Desencajada (Caballo de Troya, 2020)é a súa primeira novela, un debut novelístico en busca da identidade e un reflexo das angustias ás que se enfrontan as distintas xeracións de migrantes en España.

Artigos en El País: https://elpais.com/autor/margaryta-yakovenko/

Twitter: @margayakovenko

IG: margaritayakovenko

María Piñeiro

(Lugo,1975) é licenciada en Xornalismo pola Universidade Complutense de Madrid e conta cun mestrado de Comunicación en Saúde na mesma universidade.

Entre o 2005 e o 2007 cursou estudos de chinés na Universidade de Lingua e Cultura de Pequín cunha bolsa do goberno chinés e traballou para o xornal La Razón.

Traballa en El Progreso de Lugo, no que cobre información sanitaria e escribe un artigo semanal de opinión que se publica tamén no Diario de Pontevedra.

Artigos de opinión: https://www.elprogreso.es/author/maria-pineiro-portalon

Twitter: @mpineiroj

María Varela

(Lugo, 1974). Estudou Ciencias Empresariais na Universidade de Santiago de Compostela (USC) e cursou estudos de Xornalismo tamén na USC e na Universidade Nacional de Educación a Distancia (UNED).

Xornalista vocacional, tivo a súa primeira oportunidade en Radio Televisión Terras de Lemos. Posteriormente traballou en radio, en Radio Voz e Onda Cero, e en prensa escrita, en La Voz de Galicia.

En 2000 incorporouse a Diario de Pontevedra, no que actualmente é redactora xefa. É columnista en Diario de Pontevedra e en El Progreso de Lugo. Recibiu o xiv Premio de Xornalismo Francisco Fernández del Riego 2016 polo texto Cóxegas e tortas, publicado en Diario de Pontevedra o 29 de abril de 2016. No artigo, a autora debulla os pormenores da maternidade e reflexiona sobre a confluencia de dous sentimentos opostos: o egoísmo e o altruísmo, que se reproducen nesta situación.

Twitter: @meri_varela

IG: _meriva_

Marta García Aller

(Madrid, 1980) é xornalista. Ademais de escribir en El Confidencial, colabora en Onda Cero e La Sexta. Tamén pasou polas redaccións de El Independiente, El Mundo e Actualidad Económica.

É profesora asociada na IE Business School e na Facultade de Dereito da Universidade Pontificia Comillas (ICADE) e recibiu algúns dos premios máis prestixiosos do xornalismo económico, coma o Premio Xornalístico á Educación Financeira dos Cidadáns, concedido polo Instituto Aviva, en 2015, ou o Premio de Xornalismo á Competitividade Empresarial, concedido pola Asociación de Fabricantes e Distribuidores (AECOC), en 2013.

Lo imprevisible (Planeta, 2021) é o seu cuarto libro, que chega despois de El fin del mundo tal y como lo conocemos (Planeta, 2017), un éxito en España e América Latina.

Artigos en El Confidencial: https://www.elconfidencial.com/autores/marta-garcia-aller-2754/

Twitter: @garciaaller

IG: martagarciaaller

Marta Otero Mayán

(A Coruña, 1997). Xornalista local no diario La Opinión de A Coruña desde 2019.

Integrante do comité de redacción da revista Luzes e columnista en luzes.gal.

Representante territorial do Colexio de Xornalistas de Galicia na Coruña. Con todo por facer.

Columnas en luzes.gal: https://luzes.gal/author/marta-otero/

Twitter: @OteroTuitea

Paloma del Río Cañadas

(Madrid, 1960). Xornalista.

Pon a súa voz ás transmisións en TVE de competicións de ximnasia rítmica, ximnasia artística, patinaxe artística e hípica. Ocupou diferentes cargos na Dirección de Deportes de TVE; foi redactora xefa (2009) e directora de programas deportivos (2009-2013). É coordinadora de Patrocinios e Federacións.

Cubriu diversos campionatos de Europa e do Mundo, así como nove xogos olímpicos de verán e seis de inverno. En 2015 outorgóuselle a Medalla de Ouro da Real Orde do Mérito Deportivo e ese mesmo ano publicou o seu libro autobiográfico Enredando en la memoria.

Forma parte da xeración de mulleres pioneiras no xornalismo deportivo español xunto a Mari Carmen Izquierdo, Mercedes Milá, María Antonia Martínez, Elena Sánchez Caballero, Olga Viza, Mari Cruz Esteban ou María Escario.

O seu último libro é Más que olímpicas. Mujeres que dejaron huella más allá del deporte, publicado xunto a Juan Manuel Surroca (Libros Cúpula).

Twitter: @PalomadelrioTVE

IG: palomadelriotve

Susana Pedreira Buján

(Vitoria-Gasteiz, 1983). Xornalista. Licenciada en Xornalismo pola Universidade de Santiago de Compostela (USC).

Comezou traballando en comunicación empresarial e institucional. No ano 2010 incorpórase á redacción de Onda Cero en Galicia.

Dirixe e presenta o programa local diario Más de uno Pontevedra desde hai doce anos. En setembro de 2015 asume a coordinación de Gente viajera de Galicia, un programa semanal centrado no turismo, no ocio, na cultura e na gastronomía. Ademais, desde 2016, forma parte da programación nacional de Onda Cero co programa Un alto en el camino, seis horas de directo nas mañás da fin de semana que cada verán se emite desde Pontevedra para todo o Estado.

Coautora do libro Oito olladas sobre a folga feminista do 8 de marzo (Editorial Galaxia), no que oito mulleres moi diferentes escriben sobre a súa experiencia arredor da folga xeral e as mobilizacións do Día da Muller de 2018.

Actualmente é comisaria dos Premios Literarios convocados pola Deputación da Coruña, e formou parte do xurado de dous dos premios literarios máis prestixiosos de Galicia: o Xerais (2014) e o Torrente Ballester (2020). Nos anos 2017 e 2022 foi finalista nos Premios Follas Novas do Libro Galego na categoría de Xornalismo Cultural.

É cofundadora do congreso As Mulleres que Opinan Son Perigosas. En marzo de 2018 tivo lugar a primeira edición no Teatro Principal, o que converteu Pontevedra durante dous días na capital do xornalismo de opinión con sinatura de muller. En 2021 realizouse a cuarta edición. En 2022 publicouse o libro de entrevistas Catro anos e unha pandemia, que resume a primeira edición do congreso con conversas actuais protagonizadas por mulleres xornalistas.

Web: https://www.ondacero.es/programas/un-alto-en-camino/

Twitter: @SuPedre

IG: su_pedre