María Camacho Gascò

Directora de desenvolvemento de negocio en Plexus TEC.

É unha profesional con máis de 25 anos de experiencia en consultoría tecnolóxica (Everis, Fujitsu, Oesía). Traballou na dirección de grandes compañías, identificando oportunidades que lle achegan valor ao negocio e trasladando a visión estratéxica a realidades tanxibles, co foco en oportunidades de transformación dixital e optimización de procesos de negocio mediante o emprego de tecnoloxías innovadoras.

Ten experiencia internacional no Reino Unido, na Arxentina, en Chile e en Portugal, e nos sectores de negocio de utilities e enerxía, banca e seguros, e industria.

Está especializada en xestión de proxectos tecnolóxicos e de grandes clientes e contratos, desenvolvemento de negocio, deseño de novos produtos e oferta de servizos, xestión de operacións e persoas e definición de modelos de negocio.

Amparo Alonso Betanzos

Catedrática de Ciencias da Computación e Intelixencia Artificial na Universidade da Coruña (UDC). 

É licenciada en Química e doutora en Física pola Universidade de Santiago de Compostela (USC), foi vicedecana e coordinadora Erasmus, directora do Departamento de Informática, coordinadora da especialidade de Sistemas Intelixentes do Mestrado en Informática e do Mestrado Universitario en Bioinformática para as Ciencias de Sanidade na UDC. Foi presidenta da Asociación Española de Intelixencia Artificial de 2013 a 2021.

Actualmente é comisaria da UDC para o desenvolvemento do nodo de intelixencia artificial da cidade TIC na Coruña. É membro da lista de agarda do Grupo de Alto Nivel de Expertos Europeos en Intelixencia Artificial (AI HLG) desde 2018; da European AI Alliance e da Comisión Asesora do Goberno en Intelixencia Artificial (CAIA); e tamén membro sénior de IEEE e ACM.

Entre outros, recibiu o Premio Helena Rubinstein-UNESCO Mulleres na Ciencia, en España e finalista europea; o Premio Galicia TIC á Innovación Dixital e á Traxectoria Profesional (2019); o Premio Josefa Wononburger Planells da Xunta de Galicia (2020); e o Premio Galego do Ano 2020, do Grupo Correo Gallego.

María Xosé Rodríguez-Galdo (directora da xornada)

Catedrática de Historia e Institucións Económicas, é profesora emérita da Universidade de Santiago de Compostela (USC).

Foi directora do Centro de Estudos Avanzados-Casa Europa, vicerreitora da USC entre os anos 1984-1986 e directora do Instituto Universitario de Estudos e Desenvolvemento de Galicia (IDEGA) de 1986-1991.

É autora de numerosos libros e artigos de investigación en temas relacionados coa historia económica e empresarial, a economía e o xénero ou a demografía e os procesos migratorios. Foi directora do Centro de Estudos de Poboación e Análise das Migracións (CEPAM) e do portal www.emigratio.com.

Actualmente é vicepresidenta do Observatorio Galego de Dinamización Demográfica e, asemade, pertence ao Centro Interdisciplinario de Investigacións Feministas e de Estudos de Xénero (CIFEX) e mais ao Seminario Mulleres e Universidades da USC.

María Cadaval (directora da Cátedra Iberoamericana da USC)

Ademais de directora da citada cátedra, é doutora en Economía, con Mención Europea e con premio extraordinario de doutoramento, e realizou o Mestrado en Administración Financeira e Tributaria.

Actualmente é profesora de Economía Aplicada na USC, ademais de subdirectora da Rede de Investigadores en Financiamento Autonómico e Descentralización Financeira en España (RIFDE) e coordinadora da Rede Local de Administración Pública (Localis). Tamén pertence ao Observatorio Internacional de Regulación das Entidades do Sector Público (OIRESP) e forma parte da Cross-Research in Environmental Technologies (CRETUS) para o desenvolvemento das tecnoloxías ambientais sostibles.

En xestión universitaria foi adxunta ao Vicerreitorado de Estudantes, Cultura e Responsabilidade Social Corporativa, con funcións na coordinación da área do Servizo Universitario de Residencias e de Responsabilidade Social Corporativa da USC, e coordinadora de Erasmus para Noruega, Alemaña, Portugal e do programa de intercambio bilateral USC-América Latina.

No ámbito da divulgación participa en diferentes medios de comunicación —radio, prensa escrita e televisión— para a difusión da actividade académica e científica. Coordina o blog de financiamento público no periódico económico Expansión.

Mar Rodríguez Fernández

Experta en transformación do Sector Público, realizou o posgrao en Alta Dirección de Universidades pola Universidade Politécnica de Cataluña e o Mestrado en Administración de Empresas polo Instituto Adriano Olivetti (ISTAO).

Conta cunha ampla experiencia na área da consultoría. Foi socia de Sector Público na compañía de consultoría estratéxica e innovación SILO. Anteriormente estivo en Everis, onde desempeñou un cargo similar e foi tamén responsable de Industria Dixital-Labour Market.

A este sector chegou após varios anos traballando na administración pública, no Consorcio da Cidade de Santiago de Compostela, na xerencia da USC e na Xunta de Galicia, onde foi directora xeral de Función Pública.

Carmen José López

Avogada e socia en Lustrum Abogados, tamén é mentora de proxectos emprendedores e docente na Escola de Organización Industrial, da que ten un programa de Xestión Internacional da Empresa. Como investigadora colabora no Centro de Estudos Cooperativos da USC (CECOOP/USC).

É licenciada en Dereito pola USC, con estudos de especialización en Avogacía, Procuradoría e Práctica Xurídica, así como en Dereito Tributario e Contabilidade e mais en Dereito Mercantil. Realizou tamén estudos de doutoramento dentro do programa “A contratación: marco xurídico actual” do Departamento de Dereito Común da USC.

Foi presidenta da Federación Gallega de Jóvenes Empresarios (AJE Galicia) e exerceu como secretaria xeral da Asociación de Jóvenes Empresarios de Lugo (AJE Lugo).

Silvia Chaves Freire

Xerente de Transportes y Maderas Chaves, onde se encarga da xestión da actividade diaria desta empresa familiar dedicada ao transporte de mercancías por estrada.

Previamente traballou en firmas como Auditores de Finanzas en tarefas de auditoría a empresas de distintos sectores, coma os da alimentación, da construción e do naval.

A nivel formativo é graduada en Economía pola USC e realizou o Mestrado en Administración de Empresas pola Escola de Negocios Novacaixagalicia e a Universidade de Vigo (UVigo).

Eva López Barrio

É coordinadora do programa “Innovatia 8.3” da USC, que ten como obxectivo o desenvolvemento dunha metodoloxía de creación de spin-off universitarias de mulleres, dirixido ao persoal de apoio ao emprendemento nas Oficinas de Transferencia de Resultados de Investigación (OTRI) de universidades e centros de investigación de España.

Licenciada en Ciencias Económicas pola USC, realizou o Mestrado en Dirección e Xestión de Comercio Exterior.

Desde o 2006 é responsable do programa “Woman Emprende” e está especializada na análise e na promoción da investigación, desenvolvemento e innovación orientada á creación de spin-off universitarias lideradas polas estudantes.

Desde o 2012 é titora das axudas Emega da Secretaría Xeral de Igualdade da Xunta de Galicia, facendo acompañamento para a consolidación de empresas lideradas por mulleres que fosen beneficiarias da citada axuda de convocatoria anual.

É unha das persoas expertas do grupo de traballo Red.es sobre igualdade de xénero no ámbito dixital do Observatorio Nacional de Telecomunicacións e da Sociedade da Información (ONTSI-Red.es) e forma parte da Comisión de Traballo Mulleres en Innovación e Emprendemento e mais da Asociación de Mulleres Investigadoras e Tecnólogas de España.

Catalina Fernández de Ana Portela

Cofundadora, copropietaria, directora xeral e presidenta de Hifas da Terra, S. L., e de Hifas da Terra Group.

Bióloga, micóloga e micoterapeuta, doutora en Medicina en Oncoloxía Clínica, especialidade en Micoloxía Aplicada en Oncoloxía Integrativa. Coordina e supervisa a empresa nas áreas prioritarias de xestión, desenvolvemento de novos produtos fúnxicos e establecemento de novas cepas de fungos, así como na creación, produción e desenvolvemento de programas formativos sobre cultivo de fungos a nivel universitario.

Actualmente está implicada en diversos proxectos de I+D centrados na investigación da micoloxía aplicada a distintos campos da saúde, humana e animal, e do medio.

Diana Lameiro Aznar

É directora xeral do Centro Lingoreta. Como logopeda traballou tanto nesta institución coma, entre outras, na Asociación de Persoas Xordas e na Asociación de Persoas con Párkinson, ambas as dúas de Vigo, e tamén nos colexios San Rafael e San Francisco de Samil da cidade olívica.

Foi vicepresidenta da Asociación de Jóvenes Empresarios de Vigo (AJE Vigo), organismo do que recibiu o premio en Responsabilidade Social Empresarial. Tamén recibiu o recoñecemento ao emprendemento.

Como pedagoga ten formación complementaria, por unha banda, en trastornos específicos da linguaxe, atención infantil e neuropsicoloxía, entre outros, e tamén en desenvolvemento de programas de coaching. É titora do prácticum do Grao en Logopedia da UDC.

Vanesa Redondo Fernández

Promotora e CEO de Proplantae, empresa emerxente de agrobiotecnoloxía baseada na diagnose fitopatolóxica mediante fungos e o biocontrol con microorganismos e extractos de plantas.

Vanesa é doutora en Bioloxía e realizou o Mestrado en Xestión do Desenvolvemento Sostible pola UVigo. Traballou tamén en Fauna Útil, onde creou un laboratorio de microbioloxía cunha nova liña de investigación baseada en fungos e biocontrol, e na Estación Fitopatolóxica Areeiro da Deputación de Pontevedra, na Unidade de Fungos.

Previamente foi asistente de investigación en The James Hutton Institute, en Dundee, Escocia, e colaborou con outros organismos coma o Centro de Investigación Forestal de Lourizán, en Pontevedra, o Centro Forestal de Valsaín, en Segovia, ou El Molino de Butrera, en Burgos.