#CULTURA
“Alma Madeira Mar”
Exposición de esculturas creadas por Ch Sueiro
Coas madeiras que o mar lles devolve aos cantís e ás praias Ch Sueiro crea pezas de carácter surrealista de pequeno e medio formato, e concibe esta materia prima como un feito plástico en si mesmo, onde a madeira se converte nun pretexto para crear pezas que xorden do imaxinario e do onírico: sereas, barcos náufragos, medusas... Tamén xorden peregrinas e peregrinos para ser contemplados nas súas tres dimensións.
Sala Maruja Mallo. Sede da Deputación en Vigo
Do 9 de maio ao 16 de xuño de 2023
Inauguración: martes 9 de maio ás 19:00 horas
Performance “Corpo Salgado” de Mónica Sueiro e Marta Pérez
Confirmación de asistencia en participa.cultura@depo.es
Obradoiro “MAR D FORMA”
O mundo mar interpretado dun xeito máxico, pero tamén achegado á terra.
A mostra reúne pezas que dialogan en formas que lles dan a man á diferenza, ao accidente e á beleza.
CH Sueiro (Ourense, 1949)
Estudou Belas Artes na Real Academia de Belas Artes de San Fernando en Madrid. Destacan a súa pintura surrealista e a súa pluma, que se inspira fielmente nos gravados ingleses. En escultura traballa a madeira e o ferro para crear pezas de pequeno e gran formato. Nestes últimos anos investiga e traballa as madeiras que o mar lle devolve á terra, e crea con elas as súas series de peregrinas e peregrinos que están por todo o mundo.
Expuxo en galerías de arte e museos de España, e fixo exposicións colectivas en Milán e París.
En 1986 fundou en Ourense a Galería Conde Sueiro, onde, ademais de mostrar a súa obra de xeito permanente, tamén expoñen artistas de diferentes lugares da península e de Europa con gran traxectoria artística. A galería de arte tamén abriu as súas portas en San Lorenzo del Escorial, Baiona, Vigo, Sanxenxo e Vilagarcía de Arousa.
CORPO SALGADO
Creación: Mónica Sueiro
Interpretación: Marta Pérez e Mónica Sueiro
Duración: 15 min
Corpo que deixa o mar.
Corpo de sal.
Salgado.
Mollado nas redes dos pescadores.
O pasado atrás e unha historia que contar.
O corpo na area agarda que alguén o recolla.
Unhas mans de muller.
Metamorfose.
Arte.
Nova vida.
Outra historia.
Novas relacionadas
A artista CH Sueiro imparte este xoves o obradoiro “Mar d forma” na sede da Deputación en Vigo
30/05/2023
A auga e o mar conectan a dobre exposición de Ch Sueiro e Amelia Palacios na sede da Deputación en Vigo
09/05/2023
As artistas Amelia Palacios e Ch Sueiro amosarán as súas creacións na Sede da Deputación en Vigo
05/05/2023