#IGUALDADE
“CANTEIRA DE IGUALDADE”
Formación en igualdade
Dentro da programación do último trimestre de 2022 da Escola de Igualdade María Vinyals levouse a cabo unha nova edición da formación en igualdade para a mocidade en varios centros de ensino secundario da provincia, da man de mulleres referentes no campo da coeducación e da educación afectivo-sexual.
Debido ao éxito acadado na pasada edición e á excelente valoración desta iniciativa por parte dos centros educativos e das persoas participantes, quérese poñer en marcha novamente o curso de formación de 50 horas, que se realizará na sede da Deputación de Pontevedra en Vigo, no que se pretenden formar axentes de cambio feministas. Neste curso desenvolveranse diversos módulos que abranguen os conceptos básicos de formación feminista para preparar a formación entre iguais.
Esta actividade, dirixida principalmente ás persoas que participaron na formación de 4 horas do último trimestre de 2022, terá lugar os sábados pola mañá. Impartirana especialistas nas materias que se van tratar durante os meses de xaneiro, febreiro, marzo e abril.
As persoas admitidas serán as 20 primeiras que o soliciten, por rigoroso orde de solicitude.
Temporalización
- 40 horas de formación presencial e 10 horas de traballo práctico do alumnado, orientado, coordinado e avaliado polas coordinadoras
- Sábados de 10 a 14 h, a partir do 28 de xaneiro
FORMACIÓN
- Presentación, introdución á igualdade de xénero e marco conceptual
Presentación e conceptos de partida: xénero, patriarcado, androcentrismo, sexismo, machismo, feminismo, violencia machista (simbólica e material) e linguaxe non sexista.
-
Nin barbies nin malotes
Socialización diferencial e estereotipos.
O modelo feminino: a lei do agrado, ética do coidado, a dependencia e a submisión; os custos para as mulleres da feminidade tradicional.
O modelo masculino: mandatos da masculinidade, custos para os homes da masculinidade hexemónica, a máscara, masculinidades alternativas. - A división sexual do traballo
Fendas, discriminacións, segregación vertical e horizontal, coidados, carga mental, corresponsabilidade.
- Sex Education: o corpo e a sexualidade
Campo de batalla, a tiranía da beleza, repensar a sexualidade, o pracer feminino, consentimento, desexo, diversidade, modelos de sexualidade e autocoidado
- “Paracetamor” para “benamar”: a división sexual do amor
Construción do amor no capitalismo, mitos do amor romántico, violencia de xénero, amor compañeiro, a horta do amor
- Redes sociais
Uso consciente, ciberdelitos, relacións virtuais, abusos na rede, patróns de comunicación, sexting e novas formas de relacionármonos.
- - O lado máis escuro: cultura da violación, pornografía e prostitución
Cultura da violación, cousificación, pornografía, poder, prostitución, mito da libre elección, apoderamento feminino.
- Historia do feminismo
Feminismo como motor de transformación, crítica social, percorrido histórico, ondas e principais referentes.
RELATORAS
Priscila T. Retamozo Ramos
Mercedes Oliveira Malvar, Chis
Luísa Abad Abad
Amada Traba Díaz
Lola Varela Salgado
Cristina Louzán García
Mónica Martínez Baleirón
Silvia Pérez Freire
Priscila T. Retamozo Ramos
Politóloga pola Universidade de Santiago de Compostela, ten o Mestrado en Igualdade de Xénero da Universidade de Málaga. Realizou unha estancia como asistente técnica na ONU Mulleres de Ecuador, na área de erradicación da violencia contra as mulleres.
É coordinadora externa do Comando Igualdade e desenvolve a súa actividade profesional impartindo formación en igualdade de xénero en educación infantil, educación secundaria e formación profesional, así como formación en coeducación para o profesorado.
É autora, xunto con Chis Oliveira, do libro Comando Igualdade, a mocidade facendo a revolución feminista nas aulas!, editado por Catro Ventos, e da súa tradución ao castelán, editada por Catarata, La revolución feminista en las aulas. Comando Igualdad. Ademais é presentadora do programa feminista Histérikas Histórikas en YouTube.
Recibiu o Premio Emilia Pardo Bazán no País das Rías na categoría de feminismo.
Mercedes Oliveira Malvar, Chis
Catedrática de Filosofía, experta en educación afectivo sexual e impulsora do Comando Igualdade de Vigo, foi presidenta da ONG de Dereitos Sexuais da Federación de Planificación Familiar de España entre 1998 y 2004.
É autora de libros coma Eros, materiais para pensar o amor; O corpo como campo de batalla; La educación sentimental, una propuesta para adolescentes; Revisar la masculinidad, una condición para la igualdad; Educación para a cidadanía; e xunto con Amada Traba de Ám@me, da Editorial Galaxia, e Amarte, editado por Catarata.
Tamén é autora, xunto con Priscila Retamozo, de Comando Igualdade: a mocidade facendo a revolución feminista nas aulas!, editado por Catro Ventos, e da súa tradución ao castelán, editada por Catarata, La revolución feminista en las aulas. Comando Igualdad.
Luísa Abad Abad
É licenciada en Pedagoxía pola Universidade de Barcelona, mestra de educación infantil e primaria, asesora de Formación Permanente no CEFORE de Vigo e orientadora escolar en secundaria.
Ademais é autora do Manual para coeducar na educación infantil. DATAS e DATOS para lembrar en pé de igualdade... e non esquecer o resto do ano, en colaboración con Mercedes Oliveira, e titora de cursos de igualdade en liña na AS-PG e na Consellería de Educación.
Amada Traba Díaz
Docente da Universidade de Vigo na materia de Socioloxía da Educación, experta en políticas de igualdade en colaboración con diversas institucións locais e coa propia universidade, desde hai máis de trinta anos desenvolve actividades divulgadoras no marco da perspectiva de xénero.
É autora, xunto con Chis Oliveira, dos libros Ám@me e Amarte; Estás pola solución? Proposta de recursos didácticos para a abordaxe da violencia de xénero no ámbito sanitario; e Feminismo e sociedade laica.
Lola Varela Salgado
Profesora de ensino secundario de Lingua Castelá e Literatura. Ao longo da súa carreira docente ocupou en moitas ocasións cargos directivos. No IES A Xunqueira I de Pontevedra coordinou a elaboración do Proxecto educativo de centro con perspectiva de xénero, dirixiu o grupo de traballo Aspectos Afectivos e Sociais na Educación Sexual das e dos Adolescentes, foi responsable de programas da Consellería de Educación coma o Plan Valora-Igualdade, o Proxecto Relaciona e o Plan Proxecta (Quérote+), entre outros.
Recibiu o Premio Irene La Paz Empieza en Casa polo traballo Mellorando a convivencia entre iguais, concedido polo Ministerio de Educación en 2011.
De 2014 a 2019 estivo destinada como docente no Instituto Español Melchor de Jovellanos de Alhucemas (Marrocos); desde a Dirección deste centro continuou co labor coeducativo, en colaboración coa Asociación marroquí Forum de Femmes au Rif.
A partir de outubro de 2019, de regreso a Galicia e xubilada, foi acreditada como docente para a formación en materia de Igualdade e Prevención na Loita contra a Violencia de Xénero pola Secretaría Xeral de Igualdade. Desde entón colabora no blog Educando en igualdade e imparte charlas formativas en centros de ensino e asociacións culturais.
Cristina Louzán García
Axente de igualdade especializada en teoría feminista e prevención da violencia contra as mulleres, ten un posgrao en igualdade e un mestrado en desenvolvemento sostible pola Universidade de Vigo.
Está acreditada pola Secretaría Xeral de Igualdade como docente en materia de igualdade e prevención na loita contra a violencia de xénero. Con cinco anos de traxectoria en consultoría estratéxica internacional para o desenvolvemento local, elaborou plans de responsabilidade social desde unha perspectiva de xénero.
É formadora en igualdade para a cidadanía e o profesorado e deseña proxectos que integran a teoría feminista con diferentes disciplinas.
Mónica Martínez Baleirón
É licenciada en Filoloxía Hispánica na especialidade de Galego-Portugués en 1998 pola Universidade de Santiago de Compostela, onde tamén obtivo o Certificado de Aptitude Pedagóxica (1999), o Diploma de Estudos Avanzados (2001) e o mestrado universitario en Igualdade, Xénero e Educación (2019).
Como lingüista traballou como bolseira no Centro Ramón Piñeiro para a Investigación en Humanidades (1998-2000), no Instituto da Lingua Galega (2000-2003) e no Consello da Cultura Galega (2003-2004), e como técnica de Normalización Lingüística no Concello de Betanzos (2005-2007).
En 2007 comezou a traballar como docente de Lingua Galega e Literatura en educación secundaria.
Desde 2011 é asesora de programas educativos na Consellería de Educación e desde 2017, de igualdade, posto desde o cal colabora na formación do profesorado.
Silvia Pérez Freire
Doutora e licenciada en Socioloxía e investigadora social especializada en violencia de xénero. Desde 2007 imparte docencia en Socioloxía na Universidade de Vigo, primeiro como profesora asociada a tempo parcial e actualmente como profesora axudante doutora a tempo completo.
Traballou como socióloga independente para outras universidades, ONG e administracións públicas e foi a xerente fundadora da empresa Rizoma social S. L. dedicada á socioloxía aplicada. Froito do seu traballo nas 28 investigacións nas que estivo implicada, sete delas como directora, publicou 16 libros monográficos e unha vintena de artigos académicos sobre as súas liñas principais de investigación: a violencia sexual (prostitución e outros contextos) e os imaxinarios sociais.
A súa tese versou sobre como a trata sexual se configura como un mecanismo social de ocultación da prostitución como violencia de xénero. Foi galardoada co Primeiro Premio da Delegación do Goberno para a Violencia de Xénero a teses de doutoramento sobre violencia contra a muller para o ano 2018 en España.
Durante cinco anos dirixiu os programas e recursos para a poboación en prostitución da extinta asociación feminista Alecrín en Galicia e actualmente é cofundadora da Rede Galega contra a Trata Xexual, plataforma de 11 ONG que traballan con vítimas de trata sexual na nosa comunidade autónoma. En 2015 esta rede recibiu o Premio Medallas Castelao, que lles outorga a Xunta de Galicia ás personalidades destacadas da nosa comunidade.
Formou parte dos últimos catro anos da Comisión galega de coordinación e seguimento da actividade fronte ao VIH/sida e outras ITS da Consellería de Sanidade da Xunta de Galicia e actualmente é membro da Comisión técnica de violencia de xénero do Consello da Cultura Galega.
Nestes últimos anos participou en 28 investigacións sociais, todas elas vinculadas á violencia de xénero; as últimas correspóndenlle á dirección do Estudo exploratorio do hábitat e da convivencia igualitaria na cidade de Ourense (2019), financiado polo Concello de Ourense, o Estudo exploratorio sobre a análise e diagnóstico da situación das mulleres vítimas de violencia de xénero cun trastorno aditivo activo en Galicia (2017-2018), financiado pola Consellería de Sanidade, e a colaboración no proxecto europeo “Debuxa unha liña (Draw the Line): formación e apoderamento de mulleres inmigrantes vítimas de violencia sexual”, financiado pola Unión Europea e desenvolvido en 2017 e 2018.
Entre as súas publicacións están o informe Estudo exploratorio da trata de persoas en Galicia (Xunta de Galicia, 2013), de descarga gratuíta na rede, a coautoría do libro El putero español. Quienes son y qué buscan los clientes en prostitución (Catarata, 2015) ou, máis recentemente, Victimización en la trata sexual: imaginarios e invisibilización (Ministerio dla Presidencia, 2019).
Novas relacionadas
“Canteira de Igualdade” arranca na sede da Deputación en Vigo
28/01/2023
A Deputación revalida o seu compromiso coa formación en igualdade da mocidade da provincia coa segunda edición de “Canteira de Igualdade”
24/10/2022
A Escola María Vinyals da Deputación enfila a recta final do ano potenciando a “Canteira de Igualdade” e co segundo curso en liña sobre a Axenda Feminista
28/09/2022