A Deputación de Pontevedra segue a dar pasos adiante para cooperar e axudar aos concellos da provincia a captar fondos europeos trala posta en marcha do Plan de Recuperación, Transformación e Resiliencia do Goberno de España. Neste caso, vén de lanzar un sistema de alertas e un boletín informativo dirixido aos gobernos locais, que terá carácter mensual, para dar conta das oportunidades de financiamento en marcha e das convocatorias por vir que xorden no marco europeo. A iniciativa, que facilitará unha comunicación útil e fluída, canalízase a través da Oficina de Proxectos Europeos que creou este mesmo ano a institución provincial e que coordina os traballos de captación de fondos europeos de interese para as entidades locais.

O primeiro número inclúe todas as convocatorias e novidades de interese para as entidades locais dentro do Plan de Recuperación do Goberno, así como tamén dos fondos estruturais e do Marco Financeiro Plurianual da Unión Europea. De feito hoxe mesmo publicáronse as bases reguladoras e Convocatoria para 2022 do Programa de apoio a mulleres nos ámbitos rural e urbano (C23. I2), dirixidas, entre outros, aos concellos de menos de 5.000 habitantes. Este programa, a financiar con fondos Next Generation EU, busca a atención personalizada ás mulleres de áreas rurais e urbanas participantes en itinerarios individualizados que combinen accións de orientación laboral, asesoramento, información, formación, adquisición de competencias e habilidades transversais, e que faciliten a inserción laboral e acompañamento no emprego.

No primeiro Boletín preséntanse tamén ligazóns para convocatorias xa abertas como o Programa de Impulso á Rehabilitación de Edificios Públicos (PIREP); as axudas para investimentos a proxectos singulares locais de enerxía limpa en municipios de reto demográfico (DUS 5000); o programa de incentivos vencellado á realización de instalacións de enerxía renovables térmicas no sector residencial; o programa de incentivos vencellados ao autoconsumo e ao almacenamento no sector residencial, as administracións públicas e o terceiro sector; o programa de proxectos pioneiros e singulares de hidróxeno renovable; o programa estatal de incentivos á mobilidade eléctrica (MOVES III); as axudas destinadas á elaboración de instrumentos de ordenación ou xestión forestais; as axudas para accións silvícolas de prevención dos danos causados aos bosques por incendios, desastres naturais e para o incremento da capacidade de adaptación e do valor ambiental dos ecosistemas forestais; o programa de experiencias Turismo España; ou o programa Cidadanía, Igualdade, Dereitos e Valores.

Tamén, neste primeiro número, aparecen ligazóns para consultar outros programas pendentes de convocatoria como as dos plans de sustentabilidade turística en destino; o programa de axudas para a transformación dixital e modernización das entidades locais que forman parte da rede DTI (Destinos Turísticos Intelixentes); o programa de axudas para a tramitación dixital e modernización das entidades locais que forman parte do Camiño de Santiago integradas na rede DTI; ou o programa de Cooperación Interrexional Europeo (Interreg Europe 2021-2027).