#CULTURA

Rutas de Arquitectura

Arquitectura do século XX

A Deputación de Pontevedra, en colaboración coa Real Academia Galega de Belas Artes, propón unha nova edición das rutas de arquitectura e ofrece percorridos nos que perderse entre pazos e mosteiros, arquitectura civil e relixiosa, para coñecer de preto os exemplos máis sobranceiros da provincia.


INSCRICIÓNS

  • 35 prazas por ruta
  • Inscrición previa en roteiros.cultura@depo.gal
  • Indicaranse o nome da ruta, os nomes das persoas participantes (máximo 4 persoas por reserva) e un número de teléfono de contacto
  • A rutas 1 e 4 inclúen traslados en autobús a cargo da Deputación de Pontevedra
  • Horario: de 10:00 a 13:30h 
  • Sábado 17 de setembro de 2022: PRAZAS ESGOTADAS

    • Ruta 1. Vila de Cruces-Silleda (guía: Luz Paz Agras)
      Punto de partida: Praza Juan Carlos I de Vila de Cruces (praza do concello)
    • A xornada comezará saíndo en autobús dende Vila de Cruces para chegar ao poboado de Fontao, erguido nos anos cincuenta ao abeiro da explotación mineira de volframio en Vila de Cruces. Na visita abordarase o período orixinal de construción, como conxunto senlleiro na modernidade galega con influencias internacionais, e a rehabilitación recente coa posta en valor do patrimonio moderno. A continuación, irase en autobús ata o mosteiro de Carboeiro co obxectivo de entender a relevancia das intervencións de restauración que se realizaron a partir dos anos noventa do século pasado sobre esta peza de innegable valor patrimonial.
  • Sábado 24 de setembro de 2022: PRAZAS ESGOTADAS

    • Ruta 2. O Carril-Vilagarcía de Arousa (guía: Estefanía López Salas) 
      Punto de partida: lonxa do Carril
    • Ruta a pé por unha escolma de edificios modernistas, racionalistas e rexionalistas do Carril e de Vilagarcía de Arousa que son mostra da arquitectura galega da primeira metade do século xx, con paradas nas vivendas da rúa Vista Alegre núm. 30 e 28, Vila Güimil, casa González Garra, praza de abastos e casa Becerra, entre outras.
  • Sábado 1 de outubro de 2022: PRAZAS ESGOTADAS

    • Ruta 3. Vigo (guía: Estefanía López Salas)
      Punto de partida: miradoiro da oliveira, paseo de Alfonso XII
    • Ruta a pé por unha escolma de exemplos de arquitecturas da primeira metade do século xx (de estilo modernista, rexionalista e racionalista) de camiño á formación e consolidación dunha arquitectura moderna, mais sen esquecer os modos tradicionais de construción galegos, con paradas no edificio Simeón, edificio Mülder, antigo Banco Pastor, edificio de correos e nos edificios Sanchón e Curbera, entre outros.
  • Sábado 8 de outubro de 2022: PRAZAS ESGOTADAS

    • Ruta 4. Caldas de Reis - Portas (guía: Javier Gómez Darriba)
      Punto de partida: entrada norte da Carballeira, Caldas de Reis
    • A ruta comeza na entrada norte da Carballeira de Caldas, cun traslado en autobús á fábrica azucreira de Portas e ao seu miradoiro sobre O Salnés. Volverase a Caldas para seguir cun paseo a pé polo seu centro, onde se visitarán dous exemplos de arquitectura termal galega: o Balneario Acuña e o Hotel-Balneario Davila e, ademais, o xardín botánico e mais a carballeira. A ruta continuará cun traslado en autobús para visitar a fábrica da luz e a fervenza de Segade.

Documentos

Noticias relacionadas

 
		A Deputación esgota as 440 prazas para as “Historias cavadas” nos castros e as rutas de arquitectura pola provincia

A Deputación esgota as 440 prazas para as “Historias cavadas” nos castros e as rutas de arquitectura pola provincia

O programa de visitas teatralizadas a cinco xacementos arqueolóxicos arranca este venres en Castrolandín (Cuntis), mentres que os roteiros de arquitectura comezarán o vindeiro día 17