Voando nas Rías Baixas

#MEDIONATURAL

Rutas ornitolóxicas

As Rías Baixas ofrecen enclaves únicos ao longo da provincia de Pontevedra, desde tramos de costa acantilada e rochosa, amplos areais ou illas ata os montes densos e verdes do interior; en definitiva, lugares incomparables onde atopar unha extraordinaria biodiversidade de flora e fauna, coma aves (nidificantes, migratorias…), que fan da provincia de Pontevedra un destino con gran variedade de localizacións para a súa observación nas distintas estacións do ano e que atraen un numeroso público nacional e internacional.

Por iso, a Deputación de Pontevedra pon en marcha un ano máis o programa “Voando nas Rías Baixas” co obxectivo de contribuír á conservación e á posta en valor dos recursos naturais e ao desenvolvemento turístico e económico das zonas de alto valor ecolóxico, na súa maioría con figuras de protección tan importantes coma a Rede Natura 2000, a través da observación e do coñecemento das distintas especies de aves, o que proporciona, ademais, sensibilidade e conciencia ambientais.

RUTAS ORNITOLÓXICAS NO 2026

Actividade	Día da actividade	Prazo de inscrición
A Foz da Ramallosa e A Praia América (Nigrán) - Prazas esgotadas	08.02.26	26.01.26 ás 9 h
As Brañas de Xestoso (Silleda e Forcarei)	24.05.26	11.05.26 ás 9 h
Praia da Lanzada (O Grove e Sanxenxo)	21.06.26	08.06.26 ás 9 h
Cabo Udra (Bueu)	13.09.26	31.08.26 ás 9 h
Esteiro do Miño (A Guarda)	11.10.26	28.09.26 ás 9 h
Desembocadura do río Lérez e Intermareal Combarro-Lourido (Pontevedra e Poio)	15.11.26	02.11.26 ás 9 h
Complexo Intermareal Umia-O Grove (O Grove e Sanxenxo)	13.12.26	30.11.26 ás 9 h

CONDICIÓNS DO PROGRAMA

Todas as actividades contempladas no programa "Voando nas Rías Baixas" son gratuítas.
As prazas son nominais, polo que será un requisito imprescindible presentar o DNI ao comezo de cada actividade.
As titoras e titores legais das e dos menores de idade que non dispoñan do DNI deberán presentar un documento acreditativo da súa identidade.
Non presentar o documento de identidade correspondente implica o rexeitamento da ou das persoas a participar na devandita actividade.
As e os menores de idade deberán ir acompañados dunha persoa adulta.
Cada visita terá unha duración aproximada de dúas (2) horas.
Ofertaranse un máximo de 25 prazas por visita, xa que os grupos non deben ser moi numerosos ao tratarse dunha actividade sensible de avistamento de fauna na natureza.
Para cada actividade haberá dous puntos de encontro; un, na zona onde esta se realice, de maneira que cada participante poderá escoller o punto de encontro que mellor lle conveña segundo as indicacións sinaladas no correo de confirmación da praza. Só se lles facilitarán os puntos de encontro ás persoas que finalmente participen na actividade.
Para asistir a cada actividade ofrécese un autobús que conectará os dous puntos de encontro e que servirá para realizar as visitas guiadas nas zonas onde estas se desenvolvan.
As persoas que participasen no programa no ano 2025 non poderán repetir a mesma ruta no 2026.
Non poderán participar no programa "Voando nas Rías Baixas" as persoas que non estean debidamente inscritas e recibisen a confirmación.

INSCRICIÓNS NAS VISITAS

Todos os períodos de inscrición comezarán ás 9 h dos días sinalados en cada unha das rutas, momento no cal se habilitará un formulario en liña nesta mesma páxina web no que se poderán anotar a persoa solicitante e tres (3) acompañantes; é dicir, un máximo de catro (4) persoas por inscrición.

Este formulario pecharase cando se reciban suficientes inscricións para cubrir tanto as prazas dispoñibles coma a lista de agarda, e non se poderán realizar novas inscricións. Ademais, non se aceptarán inscricións por outras vías (correo electrónico nin teléfono).

Por último, non se permiten cambios nin correccións nas solicitudes, é dicir, as persoas que figuran na solicitude son as únicas que están inscritas no programa e as que poderán participar neste, de ser o caso.

CONFIRMACIÓNS DAS VISITAS

A lista conformarase por rigorosa orde de chegada das inscricións. A partir dese momento, a semana anterior á realización da ruta, as 25 primeiras persoas recibirán un correo para que confirmen a súa asistencia ou rexeiten a praza coa maior brevidade posible e, en todo caso, antes do luns anterior á realización da ruta, ás 12 h. Se existisen renuncias, enviaráselles un correo de confirmación ás seguintes persoas da lista de agarda, as cales deberán respectar o mesmo prazo ou, de enviarse pasado o devandito prazo, deberán contestar canto antes e sempre antes do xoves anterior á realización da ruta, ás 12 h. As confirmacións realizadas a partir dese momento debidas a renuncias de última hora deberán contestarse antes das 12 h do venres anterior á realización da ruta; toda comunicación posterior non se terá en conta.

É obrigatorio contestar os correos de confirmación de praza, polo que as persoas que non respondan ou non o fagan nos prazos establecidos quedarán automaticamente excluídas da lista e non poderán participar na ruta para a cal se lles confirmou a praza, nin en ningunha das outras incluídas no programa "Voando nas Rías Baixas" durante todo o ano.

Así mesmo, esta mesma penalización aplicaráselles a aquelas persoas que, tras confirmar a asistencia, non se presenten á actividade.
As persoas penalizadas que formen parte dunha nova inscrición, ben como solicitantes ou acompañantes, non se terán en conta á hora de realizar as confirmacións das prazas.

RECOMENDACIÓNS E MATERIAL

A roupa debe ser cómoda e de abrigo nos meses fríos, e o calzado, apropiado para moverse polo campo.
As excursións contarán con dúas persoas guías da Sociedade Española de Ornitoloxía SEO/BirdLife de Pontevedra, con experiencia e coñecementos contrastados.
Cada participante terá á súa disposición prismáticos para observar as aves e dous telescopios terrestres de alta gama para poder gozar delas sen molestalas.
Entregaráselle unha guía de aves a cada participante, excepto a quen xa dispoña dela.
Recoméndase levar unha pequena libreta para aprender a facer un caderno de campo, e tamén prismáticos e guías de campo a quen xa conte con eles.

Para más información, podes contactar co Servizo de Medio Ambiente no correo electrónico medioambiente@depo.gal ou no teléfono 886 210 725, en horario de 8 a 15 h, de luns a venres.

RUTAS ORNITOLÓXICAS

A Foz da Ramallosa e A Praia América (Nigrán)
A Foz da Ramallosa e A Praia América (Nigrán)

Día da actividade: 8 de febreiro de 2026

Prazo de inscrición: 26 de xaneiro, ás 9 h

A Foz da Ramallosa é un espazo intermareal que se atopa entre os concellos de Nigrán e Baiona (no esteiro do río Miñor). Está protexido pola Rede Natura 2000, o que destaca os seus valores naturais.

Este espazo, de alto valor ecolóxico, é óptimo para a observación de aves, non só polo preto que se poden avistar, senón tamén polo confiadas que se mostran cara ao ser humano.

Salientan as limícolas (mazaricos, biluricos, pilros…), a variedade de gaivotas, diferentes especies de garzas ou aves mariñas, coma os carráns cristados.
Tamén é posible ver a aguia pescadora, que se achega a este esteiro para pescar.
As Brañas de Xestoso (Forcarei e Silleda)
As Brañas de Xestoso (Forcarei e Silleda)

Día da actividade: 24 de maio de 2026

Prazo de inscrición:11 de maio, ás 9 h

Estupenda representación das serras baixas interiores da provincia de Pontevedra con diferentes e valiosos ecosistemas, coma brañas, prados húmidos, turbeiras, matogueira baixa, rochedos, carballeiras... Entre as aves, destacan as rapaces, coma a tartaraña cincenta, a gatafornela ou a aguia cobreira, entre outras.
Praia da Lanzada (O Grove e Sanxenxo)
Praia da Lanzada (O Grove e Sanxenxo)

Día da actividade: 21 de xuño de 2026

Prazo de inscrición: 8 de xuño, ás 9 h

Este é un dos últimos redutos da nosa provincia onde nidifica a píllara das dunas, unha ave que se enfronta a un risco moi alto de extinción.

Nesta praia, a través de telescopios e prismáticos, e mantendo unha distancia prudencial, as persoas participantes poderán ver os niños, protexidos con gaiolas e balizas, e as familias de píllaras coas súas adorables crías, que corrican pola area; ademais, tamén se lles explicarán os problemas aos que se enfronta cada ano esta ave protexida para reproducirse con éxito nos nosos areais.
Cabo Udra (Bueu)
Cabo Udra (Bueu)

Día da actividade: 13 de setembro de 2026

Prazo de inscrición:31 de agosto, ás 9 h

O cabo Udra, na península do Morrazo, é un espazo protexido pola Rede Natura 2000 e un Contorno Mariño das Rías Baixas (IBA). Está formado por acantilados rochosos e ten fermosas vistas cara á costa de Soavela, ás illas Cíes ou á illa de Ons, do Parque Nacional Marítimo-Terrestre das Illas Atlánticas de Galicia.

No lugar pódense observar paxariños migratorios que, na súa viaxe, fan unha parada no cabo, coma o pedreiro cincento, ademais doutras aves residentes coma o chasco europeo, o xílgaro europeo, o liñaceiro de bico escuro, a papuxa do mato, así como algunha rapaz, coma o lagarteiro eurasiático e o bexato común.

Xa mirando cara ao mar, pódense atopar especies mariñas coma diferentes grupos de gaivotas, corvos mariños, carráns, o mascato boreal, pardelas e, con sorte, algunha palleira grande.
Esteiro do Miño (A Guarda)
Esteiro do Miño (A Guarda)

Día da actividade: 11 de outubro de 2026

Prazo de inscrición: 28 de setembro, ás 9 h

A desembocadura do río Miño forma un esteiro con gran variedade de hábitats nos que destacan os espazos palustres, que acollen aves propias deste ecosistema, así como espazos onde o mar se xunta co río achegando nutrientes que aproveitan as limícolas, as ardeidas, os patos e as aves mariñas, coroado pola presenza das aguias pescadoras, que fan a ledicia das e dos observadores de aves.
Desembocadura do río Lérez e Intermareal Combarro-Lourido (Pontevedra e Poio)
Desembocadura do río Lérez e Intermareal Combarro-Lourido (Pontevedra e Poio)

Día da actividade: 15 de novembro de 2026

Prazo de inscrición: 2 de novembro, ás 9 h

Ao fondo da ría de Pontevedra, o Lérez verte as súas augas ao mar e achega ricos sedimentos, o que dá lugar a un interesante intermareal no que as zonas de lodo e area atraen gran diversidade de aves limícolas, mariñas, ardeidas ou anátidas.
Complexo Intermareal Umia-O Grove (O Grove e Sanxenxo)
Complexo Intermareal Umia-O Grove (O Grove e Sanxenxo)

Día da actividade: 13 de decembro de 2026

Prazo de inscrición: 30 de novembro, ás 9 h

Sen dúbida, o mellor lugar de Galicia para a observación de aves acuáticas invernantes que chegan do norte europeo escapando do frío e da neve.

Aquí xúntanse miles de aves de moi diversas especies; destacan grupos de anátidas, limícolas, ardeidas, ou os cullereiros, que teñen neste espazo un dos mellores lugares de paso e invernada da Península Ibérica.