Xan Campos (Cangas, 1987)

Formouse como pianista e compositor en conservatorios de Galicia, País Vasco, Berlín, Ámsterdam e Copenhague; unha etapa que lle permitiu estar en contacto coa vangarda do jazz europeo percorrendo salas e festivais de gran parte do continente.

Neste momento Xan Campos é un dos pianistas máis activos da península ibérica, tanto á fronte dos seus proxectos coma acompañando destacados artistas da escena do jazz de España e Portugal. Con pouco máis de 30 anos, conta cunha traxectoria especialmente extensa, gravou cinco discos ao seu nome e máis de vinte acompañando grandes figuras deste xénero musical.

Tamén goza de relevancia en América Latina, onde tocou en festivais da Arxentina, Uruguai, Chile, Ecuador ou Colombia, e actuou tamén en varias salas de Nova York.

Yudit Almeida Vidal (La Habana, 1997)

Contrabaixista e compositora cubana licenciada en Jazz pola Escola Superior de Música e Artes do Espectáculo do Porto (ESMAE). Anteriormente licenciouse en Música Clásica polo Conservatorio Profesional de Música de Ourense.

Gravou dous discos, un como parte do EJE (Eixo do Jazz Ensemble) co prestixioso pianista e compositor portugués Mario Laginha, en 2020, e outro coa cantautora Keely Denham, en 2019. O seu proxecto actual, Canto das sereias, foi presentado no festival Porta Jazz (O Porto) e no Respect, organizado polo Hot Clube de Lisboa, cunha grande aclamación da crítica.

Formou parte de importantes festivais portugueses e galegos, coma o Nigrán Jazz, Canjazz, Guimarães Jazz ou a Festa do Jazz de Lisboa, e tocou xunto a grandes nomes do panorama do jazz coma Seamus Blake, Abe Rábade, Iago Fernández, Rita María, Virxilio da Silva, Yago Vázquez, Guillermo Klein ou Jesús Santandreu, entre outros.

Gañou o segundo premio dos certames Jovens Músicos, de Portugal, e Piano Meeting, de Galicia.

Rosa Neutro

Rosa Neutro (Cangas, 1979) é artista, licenciada en Belas Artes pola Universidade de Vigo e con estudos en artes aplicadas e deseño gráfico na Escola de Arte Antonio Faílde de Ourense, faceta que combina habitualmente co seu traballo artístico.

Como artista indaga en cuestións que teñen que ver coa construción da identidade, cos clixés femininos e coas relacións e contradicións da muller-artista-nai e as súas dificultades para definirse e ter unha presenza significativa no mundo. A través da memoria, de diversas fontes literarias e da súa propia autobiografía investiga as influencias que os nosos referentes exercen na nosa configuración como suxeitos ao tempo que realiza un exercicio de deconstrución do aprendido e herdado. Para iso combina diversas técnicas como a fotografía, a fotomontaxe, a instalación ou a poesía co único obxectivo de salientar a natureza e o carácter múltiple, indefinido e cambiante do concepto “muller”.

Nos últimos anos participou en diversas exposicións individuais e colectivas, e “Estéticas do cinema” (2021) foi a súa última mostra individual, no Auditorio de Cangas. O seu proxecto Un cuarto propio foi premiado na convocatoria de comisariado da sala Zona C de Santiago de Compostela (2017), organizada polo artista Rosendo Cid, con quen tamén participa na 11.ª edición de Mulier Mulieris no Museo da Universidade de Alicante coa obra conxunta [eyos] (2018). En 2015 participou na 1.ª edición do programa “Violencia zero”, promovido pola Deputación de Pontevedra, coa súa acción colectiva Empatiza, recollida nunha publicación do mesmo nome.

Nestes últimos anos publicou Hace tiempo y a menudo y sin embargo imposible (2019) con textos de Eduardo Torres, ilustrados pola autora, ademais de editar, deseñar e poñerlle textos ao libro El cuaderno alado (2021), con fotografías de Lupe Rodríguez, autoedición que obtivo o Premio ao Mellor Traballo Comercial de Impresión Dixital nos VI premios de comunicación e márketing de Galicia (Premio Paraugas).