A Deputación vén de adxudicar as obras de mellora da mobilidade peonil na EP0407, en Ponte Caldelas, cun orzamento de 233.538 euros, un proxecto enmarcado no modelo de mobilidade segura e sostible que promove a institución provincial. A obra será financiada ao 100% pola Deputación, xa que o 30% de aportación municipal previsto no convenio entre ambas administracións asumirase cunha achega do Plan Concellos.

A actuación desenvolverase nun tramo de 225 metros desta estrada do casco urbano (rúa Lepanto e a contorna do Centro de Saúde) para convertela nun espazo público de calidade, e garantindo a mobilidade peonil e a accesibilidade universal. Deste xeito, as obras prevén a execución dunha zona de convivencia con prioridade peonil, que terá limitación de velocidade de 20 km/h, mentres que no resto do tramo manterase velocidade máxima de 30 km/h.

Os traballos se completan con actuacións de xardinería, co soterramento das liñas de electricidade e telecomunicacións agora en aéreo, así como a execución dunha nova rede de alumeado con luminarias LED de alto rendemento.