#IGUALDADE
Mesa de debate “Conciliación na produción audiovisual, o reto silenciado pendente”
Escola de Igualdade María Vinyals
Salón de plenos do Pazo provincial, Pontevedra
Martes 28 de febreiro de 2023, de 19 a 20 horas
Esta actividade é de balde ata completar a capacidade. É necesaria a inscrición previa
- Paula Cons, produtora, directora e nai
- Gael Herrera, produtora executiva e nai
- Adriana P. Villanueva, produtora, directora e nai
- Jaione Camborda, produtora, directora e nai
Modera: Uxía Caride, xerente da Asociación Galega de Produtoras Independentes (Agapi)
A Deputación de Pontevedra, desde a Escola de Igualade María Vinyals en colaboración con Agapi, organiza unha mesa de debate, que terá lugar o vindeiro martes 28 de febreiro, dedicada a analizar aspectos relacionados coa conciliación na produción audiovisual da man de voces tan destacadas coma Paula Cons, Jaione Camborda, Gael Herrera ou Adriana P. Villanueva.
Baixo o título “Conciliación na produción audiovisual, o reto silenciado pendente” abordaranse cuestións coma as dificultades á hora de conciliar a vida laboral e familiar, os retos aos que se enfrontan as mulleres embarazadas á hora de organizar a súa substitución no traballo, o papel da muller no sector audiovisual unha vez que é nai, a multitarefa ou a necesidade de ter que elixir entre os coidados ou asumir unha carga extra de traballo poucas veces recoñecida.
O programa está composto por unha mesa de debate na que catro mulleres cineastas, produtoras, directoras e nais, contarán as súas experiencias como profesionais nun debate moderado por Uxía Caride.
RELATORAS
Paula Cons
Gael Herrera
Adriana P. Villanueva
Jaione Camborda
Uxía Caride
Paula Cons
Licenciada en Xornalismo, é directora e produtora executiva. Está especializada en ficción baseada en feitos reais (A illa das mentiras, Lobos sucios) e en documentais (¿Dónde está Marta?, de Netflix; A batalla descoñecida, de TVE, en Amazon Prime e estreado na Semana Internacional de Cine de Valladolid, Seminci).
En 2019 dirixiu a súa primeira longametraxe, A illa das mentiras (TVE, TVG e ETB), protagonizada por Darío Grandinetti, Aitor Luna e Nerea Barros. Gañou o Blogos de Ouro á Mellor Película, cinco premios Mestre Mateo, o premio ao mellor telefilme no Celtic Media Festival e á mellor película no London Spanish Film Festival.
Foi directora e guionista do documental histórico e de investigación A batalla descoñecida, que foi seleccionado para competir na Seminici na sección DocsEspaña, acadou o Mestre Mateo ao mellor documental e gañou o Festival de Cinema e TV de León. O seu último proxecto, a serie de ficción Oro negro, en fase de desenvolvemento, foi seleccionado en Iberseries Pitch no Content London C21 e no top 30 Best Drama Series Pitch. Foi escollida para participar no V Laboratorio de Creación de Series de Televisión da SGAE con Javier Oliveirais e tamén no Pitching Internacional do Conecta Fiction and Entertainment.
Como produtora executiva traballou no documental científico O futuro da mente, emitido en decembro de 2019 na canle #0 de Movistar. O último documental do que foi produtora executiva e guionista é A cero.5, dirixido por Gonzalo Suárez e estreado na Seminci.
Recentemente estreou a serie documental de Netflix ¿Dónde está Marta?, da que é directora, e que acadou durante semanas o primeiro posto na plataforma como contido máis demandado en España.
É nai dun neno de once anos.
Gael Herrera
Emprendedora audiovisual e realizadora de cine e televisión, é produtora executiva de Tamboura Films, unha empresa situada en Santiago de Compostela e dedicada á produción de cine e televisión. Acaba de producir o documental No somos nada, dispoñible en Netflix, sobre a banda musical La Polla Récords, co que acadou un notable éxito en festivais e mercados internacionais.
É realizadora para a Televisión de Galicia de programas producidos desde Tamboura Films coma Que casas, Historias mínimas e Escaparate. Na actualidade traballa temporalmente en Madrid como realizadora en Televisión Española para o programa Días de tele. Ente tanto bulir consegue sacar tempo para atender a súa filla e poder manter así a lactación materna; este é o seu maior logro.
É nai dunha nena dun ano e medio.
Adriana P. Villanueva
Licenciada en Comunicación Audiovisual na Universidade de Santiago de Compostela, especializouse en Animación na Escola de Cine de Madrid. Foi bolseira na televisión local de Chantada, Televinte, e no Festival de Animación Animacam en Sandiás.
En 2014 dirixiu o proxecto Videocartas Galiza-Berlín, que pon o foco na actual emigración galega, neste caso na capital alemá. Desde 2012 é integrante da produtora audiovisual Illa Bufarda, onde desenvolve a súa actividade creativa e docente. Codirixiu xunto con Sabela Iglesias, integrante da mesma produtora, as longametraxes Fíos fóra, historias de obreiras entre costuras e patróns (2015) e Negro púrpura (2021).
En 2021 dirixiu o documental Con etiqueta, sobre a saúde mental das persoas diagnosticadas e das súas familias na Asociación Pro Saúde Mental A Creba e formou parte do proxecto
É nai dun neno de ano e medio.
Jaione Camborda
Tras rematar os seus estudos cinematográficos na Escola de Cine de Praga e na Escola de Cine de Múnic trasládase a Galicia, onde funda a produtora Esnatu Zinema, coa que forxa un recoñecido traballo como directora de pezas rodadas con material fílmico de corte experimental, coma Proba de axilidade, Nimbos, Lilit ou Rapa das bestas. Nos seus temas habituais reflexiona sobre a relación do ser humano co animal, coa violencia e co atávico desde un punto de vista etnográfico. Dirixiu a longametraxe de ficción Arima, coa que participou no Festival de Cine de San Sebastián e conseguiu o premio á mellor dirección Nuevas Olas no Festival de Cine Europeo de Sevilla. É guionista de traballos coma Ons, Os fenómenos, Arima e O corno do centeo, ademais de directora de arte de longametraxes coma Las altas presiones, Encallados, Lúa vermella e O ouro do tempo. Ademais das súas curtametraxes, Jaione produciu con Esnatu Zinema a longametraxe Arima e o documental Verengo.
Actualmente está a desenvolver a súa segunda longametraxe de ficción O corno do centeo. Máis información en: https://jaionecamborda.com
É nai dun neno de ano e medio.
Uxía Caride
Licenciada en Comunicación Audiovisual, está especializada en produción executiva. Traballa desde hai máis dunha década como xerente da Asociación Galega de Produtoras Independentes (Agapi) na representación e defensa dos intereses das empresas de produción audiovisual. Compaxina este labor co de docente na Universidade de Santiago de Compostela, na que exerce como profesora asociada en materias relacionadas coa cultura dentro do Grao en Ciencias da Cultura e Difusión Cultural. Fortemente implicada na xestión cultural galega, forma parte desde hai anos da directiva da Asociación Culturgal, na que se encarga da área de cinema, e colabora de forma frecuente organizando programacións e xornadas formativas para diferentes entidades coma o Concello de Santiago, a Feira Culturgal ou o Festival de Cinema Fantástico da Coruña FKM, entre outros.
É membro da Academia Galega do Audiovisual, da Asociación Galega de Xestores Culturais e da Asociación de Mulleres Cineastas e asesora na Ourense Film Commission. Participa en foros de debate de diversa índole coma o FICRural, a Feira Internacional da Economía e Cultura Rural e Alternativa, a Mostra de Teatro Cómico e Festivo de Cangas, e en xornadas formativas organizadas por distintas entidades. Recentemente formou parte do xurado dos Premios da Crítica de Galicia na categoría audiovisual e do Festival Cinema Miúdo (Ames).
Novas relacionadas
Directoras e produtoras executivas reflexionan na Deputación sobre a corresponsabilidade como reto pendente na industria audiovisual
28/02/2023
A Deputación celebra esta semana dúas xornadas sobre conciliación na produción audiovisual e a saúde do sector cultural
26/02/2023
A Deputación e Agapi organizan unha xornada sobre a conciliación na produción audiovisual
16/02/2023