Actividade Xuventude con formulario - Deputación de Pontevedra

Encontro Provincial

Pontevedra Literaria. Xuventude e Artes

“Escribir o que non se di”

PROGRAMA
PARTICIPANTES E RESEÑAS

En directo

A Deputación de Pontevedra, tras o éxito da primeira edición, presenta a segunda convocatoria do encontro literario e artístico Pontevedra Literaria. Xuventude e Artes.

Este evento naceu no mes de outubro de 2024 co lema "Vivir das letras", no queparticiparon, como relatoras e relatores, autores recoñecidos de ámbito internacional coma Héctor Abad Faciolince, Manel Loureiro ou Arantza Portabales, entre outros

Pontevedra Literaria naceu para darlle resposta ao crecente interese amosado pola mocidade nas iniciativas de creación literaria e artística, que se manifesta nun incremento notable de solicitudes de participación na categoría de traballo literario breve dos Premios Provinciais á Xuventude.

Este acrecentamento foi o que levou a esta institución provincial a deseñar accións complementarias para poñer en valor o talento xuvenil da provincia, como a organización dunha exposición de fotografía recompilatoria de todos os traballos gañadores nesta categoría dos Premios Provinciais á Xuventude, dunha exposición de pinturano Edificio Castelao na que participaron pintoras emerxentes e a publicación de Xuventude en palabras, onde se recollen todos os traballos gañadores de narrativa e poesía desde 2017 ata 2024 dos citados premios.

Como preámbulo deste evento, e como primeira actividade, o pasado 31 de xaneiro de 2025 tivo lugar no Edificio Castelao do Museo de Pontevedra unha charla impartida polo escritor colombiano Santiago Gamboa.

Tras rematar o prazo de presentación de traballos da IX Edición dos Premios Provinciais á Xuventude, continúase a tendencia que se vén observando nos últimos anos, o incremento da participación nas categorías de traballo literario breve e de banda deseñada, o que amosa que as accións realizadas por esta institución redundan nunha maior participación xuvenil nos eidos artístico e literario.

Xa que logo, o próximo mes de outubro desenvolverase unha segunda edición, co lema "Escribir o que non se di", que terá lugar os días 23 e 24 de outubro no Pazo provincial.

Nesta ocasión participarán novamente escritoras e escritores de traxectoria consolidada, así como persoas galardoadas nas oito últimas edicións dos Premios Provinciais á Xuventude, librerías, clubs de lectura, editoriais e, por suposto, amantes da lectura.

Este encontro demostrou ser unha grande oportunidade para que as persoas convidadas compartan as súas motivacións, relaten as súas experiencias no mundo literario e dean consellos e recomendacións para quen se queira iniciar nesta disciplina, especialmente as mozas e os mozos con vocación escritora.

Alén desta actividade principal, o encontro completarase con dúas accións centradas na banda deseñada:

Xuventude en Viñetas: catro obradoiros dirixidos a mozas e mozos de entre 12 e 18 anos, pensados para explorar o mundo da banda deseñada
Exposición de banda deseñada, na que se amosarán as obras gañadoras das últimas oito edicións dos Premios Provinciais á Xuventude.

Programa do Encontro Pontevedra Literaria. Xuventude e Artes, “Escribir o que non se di”

Pazo provincial. Pontevedra

23 de outubro, de 19 a 21 h
- 1.ª xornada: "Por que escribimos"
  - Condutora da xornada: Paula Montes
  - Actuación musical a cargo de Andrea García González (piano)
  - Apertura por parte do vicepresidente da Deputación, Rafael Domínguez
  - Mesa redonda con Ledicia Costas e Jorge Volpi
  - Preguntas e interacción co público asistente
24 de outubro, de 18 a 20 h AFORO COMPLETO
- 2.ª xornada: "Xornalismo e ficción"
  - Condutora da xornada: Paula Montes
  - Actuación musical a cargo de Andrea García González (piano)
  - Benvida por parte do deputado de Cultura, Xuventude e Reto Demográfico e Desenvolvemento Rural, Jorge Cubela
  - Mesa redonda con Laura Ferrero e Manuel Jabois
  - Preguntas e interacción co público asistente

Ligazóns de interese

PARTIPANTES E RESEÑAS

Jorge Volpi

Jorge Volpi

Jorge Volpi (México, 1968) é autor de quince novelas, entre as que destacan A pesar del oscuro silencio (1993), a Triloxía do século xx ―formada por En busca de Klingsor (Premio Biblioteca Breve, 1999), El fin de la locura (2003) e Tiempo de cenizas (2006)―; La tejedora de sombras (Premio Planeta-América, 2011), Oscuro bosque oscuro (2010), Memorial del engaño (2013), Las elegidas (2014), Una novela criminal (Premio Alfaguara, 2018, e a partir da cal se realizou a serie homónima de Netflix) e Partes de guerra (2022).

Tamén escribiu os ensaios La imaginación y el poder (1998), La guerra y las palabras (2004), Mentiras contagiosas (Premio Mazatlán, 2008), El insomnio de Bolívar (Premio Debate-Casa de América, 2009), Leer la mente (2011) e Examen de mi padre (2016), ademais do libro de relatos Enrabiados (2023).

Por outra banda, é autor das obras de teatro Las agujas dementes (2020), Mesa redonda (2024) e Los amores feroces (2025), e dos libretos das óperas Cuatro corridos (2011) e Tristana (2025). En 2008 recibiu o Premio José Donoso ao conxunto da súa obra e a Medalla da Orde de Isabel a Católica de España, ademais de ser nomeado cabaleiro da Orde de Artes e Letras de Francia. Entre os seus libros, que foron traducidos a trinta idiomas, o máis recente é La invención de todas las cosas. Una historia de la ficción (2024).

Actualmente é director artístico do Centro de Cultura Contemporánea Condeduque en Madrid.
Laura Ferrero

Laura Ferrero

Laura Ferrero é escritora, xornalista e guionista. Autora dos libros de relatos Piscinas vacías (Alfaguara, 2016) e La gente no existe (Alfaguara, 2021), das novelas Qué vas a hacer con el resto de tu vida (Alfaguara, 2017) e Los astronautas (Alfaguara, 2023). Tamén, do álbum ilustrado El amor después del amor (Alfaguara, 2025), en colaboración con Marc Pallarès. Escribe habitualmente en El País e é colaboradora do programa La Ventana, da Cadena SER.

Ademais, traballa como guionista de cinema e en 2023 escribiu, xunto a Isabel Coixet, o guion da película Un amor.
Ledicia Costas Álvarez

Ledicia Costas Álvarez

Ledicia Costas Álvarez (Vigo, 1979) é unha das autoras máis recoñecidas e traducidas da literatura galega, a linguas coma o persa, o coreano, o italiano ou o búlgaro, entre outras.

A súa primeira novela, Unha estrela no vento, veu a luz no 2000. Desde entón publicou (sen contar coautorías) trinta e oito obras en galego e español que non deixan de reeditarse, tanto de narrativa infantil e xuvenil coma adulta e de poesía, en Edicións Xerais de Galicia, Anaya, Destino ou Nórdica Libros, entre as editoriais españolas máis relevantes.

No campo da literatura infantil e xuvenil conta con importantes recoñecementos coma o Premio Nacional de Literatura concedido en 2015 polo Ministerio de Cultura pola súa obra Escarlatina, a cociñeira defunta.

En dúas convocatorias foi merecedora do Premio Merlín de Literatura Infantil e é a única persoa na historia do Premio Lazarillo (o decano deste ámbito en España) que logrou gañalo en tres ocasións, a última en 2022 con A lebre mecánica.

En 2020 recibiu o Premio da Cultura de Galicia de Creación Literaria do que é a persoa máis nova en recibilo desde a fundación do galardón, e en 2023 foi distinguida pola Xunta de Galicia coa Medalla Castelao, coa que se recoñece a valía da súa achega á cultura en toda a súa traxectoria profesional.

No ámbito internacional acadou recoñecementos coma o Premio White Ravens, concedido pola Biblioteca de Múnic, ou a inclusión na Lista de honra de Ibby.
En 2022 regresou á poesía con Ultraluz, gañadora do prestixioso XX Premio de Poesía Afundación.

A súa obra para adultos inclúe as novelas Un animal chamado néboa (2015), Infamia (2019), Golpes de Luz (2021) e Pel de cordeiro (2024).

En 2024 recibiu o Premio Zenda polo álbum ilustrado Sete dentes de león (Edicións Xerais de Galicia, 2024) e no 2025 gañou o premio Barco de Vapor pola obra Feriópolis, outorgado pola Fundación SM.
Manuel Jabois

Manuel Jabois

Manuel Jabois (Sanxenxo, 1978) empezou a súa carreira como xornalista en Diario de Pontevedra. Tras pasar por El Mundo, desde 2015 escribe en El País. Tamén ten un espazo diario no programa Hora 25 da Cadena SER. Como escritor, publicou a novela A estación violenta (2008), as recompilacións de artigos Irse a Madrid (2011) e Hay más cuernos en un buenas noches (2022), Grupo salvaje (2012) ―unhas breves memorias sentimentais sobre o Real Madrid―, Manu (2013) e un longo traballo sobre o 11-M titulado Nos vemos en esta vida o en la otra (2016). En 2019 publicou con grande éxito de crítica a súa primeira novela en Alfaguara, Malaherba. A segunda, Miss Marte (2021), terminou de consagralo como un dos escritores en español máis populares da súa xeración. Mirafiori é a súa terceira novela.

ACTUACIÓNS MUSICAIS

Andrea García González

Andrea García González

É unha pianista e cantante de Marín, afincada en Pontevedra, que se define a ela mesma como unha artista do máis versátil, acostumada a interpretar repertorio clásico, folk, pop, rock e indie. Na actualidade compaxina as súas actividades de intérprete coa de profesora de canto e disciplinas teóricas en Quodlibet, centro que dirixe na cidade de Pontevedra.