Familia: Theaceae

Arbusto perenne

Floración no inverno e na primavera

Orixe: orixinada no Xapón en 1922 por Mr. Uyematsu, de Star Nursery.

Porte e altura: arbusto de porte aberto e de crecemento medio.

Follas: de cor verde clara brillante, con nervación moi marcada, moi onduladas e flexibles, duns 10 cm de longo e 6 cm de ancho, con forma elíptica, marxe serrada e ápice apuntado.

Flores: grandes, de entre 10 e 12,5 cm de diámetro, forma semidobre a peonia aberta, de cor branca, con arredor de 25 pétalos, os externos son cordados e os internos máis estreitos, coa marxe ondulada. Os filamentos dos estames son brancos e poden ter algún petaloide.

Outros datos: florece desde xaneiro ata maio.

Usos e curiosidades: utilízase como planta ornamental. Foi importada a EUA por Nuccio’s Nurseries, que a distribuíu como ‘White Daikagura’.

Necesidades e cultivo: é propia de climas temperados e húmidos, con choivas abundantes. Crece mellor á sombra e ao abrigo de árbores máis altas, en solos ácidos, ricos en materia orgánica e ben drenados. Aínda que non require unha poda anual, responde moi ben a ela, e é necesaria cando se quere facer a planta máis compacta e arbustiva ou para darlle unha determinada forma.