Familia: Hydrangeaceae

Arbusto caducifolio

Orixe: rexións temperadas e subtropicais do Xapón e da China.

Porte e altura: porte arbustivo moi ramificado; pode acadar os 8 m de altura, aínda que é máis habitual vela con portes máis baixos debido á poda realizada para favorecer a floración.

Follas: grandes, dispostas normalmente en pares opostos, con forma oval, de marxe serrada e ápice apuntado.

Flores: pequenas, con 4 ou 5 sépalos brancos, crema ou rosados, dependendo da variedade, dispostas en panículas en forma de cono, que é o que distingue esta especie doutras hortensias. As inflorescencias son de longa duración, desde o verán ata o outono.

Outros datos: existen moitos cultivares; entre os máis coñecidos podemos destacar ‘Grandiflora’, ‘Limelight’, ‘Vanille-Fraise’, ‘Pinky Winky’, ‘Big Ben’ ou ‘Floribunda’.

Utilidades e curiosidades: adoitan empregarse como exemplares illados ou en grupos, normalmente en esquinas ou próximas a muros ou peches de leiras.

Necesidades e cultivo: medra en solos fértiles ricos en materia orgánica, húmidos pero ben drenados. Prefire exposicións a pleno sol ou sombra parcial en zonas protexidas do vento. É recomendable unha poda ao rematar o inverno para favorecer a floración.