Foco xuventude

#XUVENTUDE

CICLO DE FORMACIÓN PARA PERSONAL TÉCNICO DE JUVENTUD

A Deputación de Pontevedra pon en marcha o ciclo de obradoiros Foco Xuventude, unha iniciativa deseñada para reforzar a competencia técnica e a calidade dos servizos dirixidos á mocidade nos concellos da provincia.

Esta acción deriva das demandas expresadas polo persoal técnico dos concellos, que solicita formación en temas esenciais para mellorar o asesoramento á xuventude e a orientación das súas iniciativas. Deste xeito, mediante o apoio técnico aos municipios, preténdese promover unha formación de calidade que impulse o coñecemento sobre a realidade xuvenil para optimizar os recursos e as actuacións dirixidas a este colectivo.

O ciclo Foco Xuventude estará formado por unha serie de obradoiros centrados nas temáticas máis demandadas polo persoal dos concellos, entre as que destacan a saúde mental, as novas tecnoloxías e os programas europeos.

A formación está dirixida principalmente ao persoal técnico de Xuventude e OMIX. Conscientes da desigualdade de recursos entre os municipios que conforman a nosa provincia, o ciclo está aberto ao persoal de Servizos Sociais, Cultura ou áreas afíns naqueles concellos que non conten con persoal específico para a área de Xuventude.

A primeira convocatoria, e a máis solicitada, céntrase no ámbito da saúde mental.

OBRADOIRO 1. Construíndo Benestar: Estratexias en Saúde Mental

Obxectivo xeral: proporcionarlle ao persoal técnico dos concellos da provincia coñecementos e ferramentas prácticas para a promoción da saúde mental entre a mocidade, a detección temperá de indicadores de risco e o manexo de primeiras respostas.

Docente: Joaquín Dosil, doutor en Psicoloxía e profesor desta disciplina na Universidade de Vigo.

Programa

Consta de dúas sesións, divididas en dúas xornadas diferentes:

Xornada 1. Teórica

Data: luns 26 de xaneiro

Horario: de 10 a 12 h

Modalidade: telemática

Contidos:

Análise das diferentes xeracións coexistentes na sociedade actual
As dificultades relacionais nas diferentes etapas da vida
Comportamentos de risco e trastornos (TCA, ideas suicidas, autolesións...)
O impacto das redes sociais no día a día (autoestima, desexabilidade social, acoso e violencia...)
Neurodiverxencia (TEA, TDAH, AC)

Xornada 2. Práctica

Data: luns 2 de febreiro

Horario: de 10 a 14 h

Modalidade: presencial, no salón de actos do Edificio Administrativo da Deputación de Pontevedra (avda. Montero Ríos, s/n)

Contidos:

Contexto para o traballo con persoas de risco
A información e a comunicación para previr situacións de risco
Xogos de rol de entrevistas a familias e a mozas e mozos con algún tipo de dificultade
Intelixencia emocional

Ao remate da acción formativa entregaráselles ás persoas asistentes un diploma acreditativo da boa execución e das horas de formación recibidas.

Criterios de selección de participantes

Para garantir a efectividade e a calidade da formación, establécense as seguintes condicións de participación e os criterios de selección en caso de alta demanda:

O número máximo de asistentes á formación é de 30 persoas.
Se o número de solicitudes superase o límite de 30 prazas, aplicarase a seguinte orde de prelación:
- En primeiro lugar, priorizarase a inscrición dunha única persoa por concello. No formulario de inscrición, as persoas solicitantes deberán indicar se son a persoa prioritaria designada polo seu concello para asistir á formación. En caso de que as solicitudes prioritarias superasen o límite de 30, a selección farase por rigorosa orde de inscrición.
- Se, despois de asignarlles as prazas ás persoas prioritarias, non se acadase o límite de 30 asistentes, as prazas restantes asignaránselles ás persoas non prioritarias por estrita orde de inscrición.
- As persoas que non obteñan praza entrarán a formar parte dunha lista de agarda.

Ademais, a Deputación valorará a opción de convocar unha segunda edición do curso para darlle cabida á demanda e garantir a formación no maior número posible de concellos.

Inscricións

As inscricións realizaranse mediante o formulario habilitado.
O prazo de inscrición estará aberto desde o luns 29 de decembro, ás 10 h, ata o luns 19 de xaneiro, ás 10 h.

O propio luns 19 de xaneiro notificaráselles por correo electrónico ás persoas solicitantes se obtiveron praza no curso ou quedaron inscritas na lista de agarda. Aquelas persoas seleccionadas para o curso deberán confirmar a súa asistencia.