A deputada provincial delegada de Turismo, Nava Castro, acaba de participar na Estrada xunto ao seu alcalde e tamén deputado provincial, José López Campos, na presentación de Gastrotur do Ulla, o Salón dos recursos turísticos, gastronómicos e deportivos nas Terras do Ulla. Durante a súa intervención, a deputada destacou que “A Estrada conxuga á perfección o que é esta provincia e o que queremos que sexa: Pontevedra é desfrutar!”. Neste eido, Nava Castro repasou os principais atractivos turísticos da vila e aproveitou a ocasión para destacar a importancia de sumar sinerxías tanto “da man do sector público, conxuntamente cos concellos, e tamén do sector privado” para acadar “o éxito nun sector tan competitivo como é o turístico” e conseguir que “esta provincia se converta no centro turístico do Norte Peninsular: temos moitas posibilidades, unha oferta ampla, variada e de calidade, e un lugar que reúne todas as condicións para vivir experiencias inesquecibles os 365 días do ano”.