O Castelo de Sobroso reabre as visitas ao público trala súa musealización

Desde hoxe as persoas poden reservar praza para visitar a fortaleza na nova web www.castelodesobroso.com, que tamén amosa a historia do castelo e o seu espazo natural

13/05/2022

Castelo de Sobroso

“Sobroso é un castelo de guerra, o torreón de defensa, que domina a comarca e outea, desde as súas fiestras, dilatado treito de país”. Esta cita de Emilia Pardo Bazán, que se consideraba descubridora das súas ruínas, preside a portada da nova web do Castelo de Sobroso, que trala súa recente musealización pola Deputación e tralo éxito das xornadas de portas abertas na Semana Santa, reabre as visitas ao público a partir deste sábado co sistema de reservas de prazas que xa está operativo na web www.castelodesobroso.com.

A nova páxina, que resume o seu contido na frase  “Unha historia, un castelo, unha experiencia para o recordo”, está dispoñible en tres idiomas: galego, castelán e inglés. Amais de facilitar a xestión da reserva e compra de entradas, ofrece ampla información sobre a historia de Sobroso e as características da nova musealización, así como do espazo natural e a senda que rodean a fortaleza, xunto coa súa flora e fauna de grande interese ambiental.

O castelo estará aberto de luns a domingo entre maio e outubro (no resto do ano pechará os luns) e tamén estará cerrado os días 1 e 6 de xaneiro, amais do 24, 25 e 31 de decembro. Na web amósanse os horarios de visita (polas mañás estará aberto entre as 10 e as 13 horas e polas tardes das 16 ás 19 horas) e as persoas interesadas poderán elixir entre un total de 14 pases diarios dispoñibles, con visitas guiadas cada media hora. A duración dos percorridos é de 50 minutos e están deseñados para grupos de un máximo de 15 persoas, xa que están pensados para garantir a calidade das visitas dentro das sete salas musealizadas, así como a súa capacidade de aforo.

No que atinxe ás tarifas, existe unha ordinaria de 4 euros, e haberá descontos para familias numerosas, persoas desempregadas, estudantes, mentres que se establece a gratuidade para as excursións escolares programadas. Por outra banda, o 18 de maio, Día Internacional dos Museos, o acceso será gratuíto, ao igual que o Domingo do Corpus (este ano o 19 de xuño), coincidindo coa festa de Ponteareas declarada de Interese Turístico Internacional.

A imaxe que hoxe en día loce o castelo é similar á que tivo cando foi chamado “a chave forte do Reino de Galicia”, grazas a última intervención realizada pola Deputación de Pontevedra. A institución investiu máis de 260.000 euros na recente musealización de Sobroso, que permitiu dotar ao recinto dun equipamento museográfico actual, baseado nas novas tecnoloxías, para potenciar o seu atractivo acorde coas tendencias da demanda turística. Deste xeito, a musealización representa un novo produto estratéxico para a comarca do Condado-Paradanta, que busca mobilizar o turismo familiar e atraer visitantes cara outras iniciativas turísticas xa existentes na contorna, como o termalismo ou a enogastronomía.

O percorrido polas distintas salas abrangue sete temáticas: “Sobroso na paisaxe”, cunha impresión fotográfica dun gran mapa no chan e caixas retroalimentadas con imaxes nas paredes; “A historia do Castelo e os seus habitantes”; cun audiovisual que narra a vida na fortaleza medieval; “O castelo, protagonista na Idade Media”, cunha montaxe con elementos téxtiles e módulos de personaxes como Urraca I de León, Alfonso VII de León, Dinis de Portugal ou Isabel de Aragón; “O castelo, da destrución á recuperación”, que consiste nun “videomapping” para simular a destrución e reconstrución do castelo sobre as propias pedras, centrándose nos cambios experimentados no século XX e no papel desenvolvido polo xornalista Alejo Carrera; “A construción do Castelo”, con paneis gráficos sobre os traballos para erixir a fortaleza; “Os seres máxicos e a auga”, que inclúe lendas dos bosques de Sobroso nun ambiente iluminado especialmente para a ocasión; e “Os castelos, escenario de trobadores”, onde se recupera a tradición oral en torno ao castelo e a súa contorna. A visita remata co acceso á terraza, situando as e os visitantes na comarca e nos recursos da mesma.

O bosque que rodea á fortaleza é tamén un museo vivo. Para divulgar os singulares valores da finca creouse unha senda botánica que se percorre a través dun sinxelo paseo circular. Durante o percorrido, varios paneis con QR acompañan ás persoas visitantes no descubrimento das especies clave que logran o equilibrio do bosque, convertendo a visita nunha pequena aventura. Na páxina web inclúese, amais da información sobre a senda e o bosque, un apartado con fotos da fauna existente. Trala reforestación levada a cabo pola Deputación, numerosos animais obteñen na finca o alimento e refuxio que lles proporciona este bosque atlántico. 

Galerias de imaxes

Noticias relacionadas

 
		“Love Rías Baixas” namora Bilbao con máis de 20.000 visitantes no stand da Deputación

“Love Rías Baixas” namora Bilbao con máis de 20.000 visitantes no stand da Deputación

A oferta de termalismo, turismo activo, enoturismo e natureza de Pontevedra Provincia conquista ao público vasco no Exhibition Center da Feira Expovacaciones

 
		O turismo na provincia de Pontevedra outra vez de récord esta Semana Santa cunha ocupación media do 80% e superando os rexistros do 2019

O turismo na provincia de Pontevedra outra vez de récord esta Semana Santa cunha ocupación media do 80% e superando os rexistros do 2019

Os espectaculares datos supoñen vinte puntos máis do previsto para establecementos hoteleiros e doce puntos máis para vivendas turísticas

 
		Os castelos de Sobroso e Soutomaior referentes turísticos da provincia nesta Semana Santa

Os castelos de Sobroso e Soutomaior referentes turísticos da provincia nesta Semana Santa

O Castelo de Sobroso, gran protagonista tras a súa musealización, arranca este sábado as xornadas de portas abertas coa totalidade das prazas esgotadas

— 3 Resultados por páxina
Mostrando o intervalo 1 - 3 de 6 resultados.