A Deputación de Pontevedra acaba de aprobar achegas por valor de 30.000 euros para oito entidades das comarca de Deza e Terra de Montes que traballan no ámbito social. Estas axudas servirán para financiar distintas actuacións que estes colectivos, radicados en Lalín, Silleda e A Estrada, desenvolven para axudar a persoas en situación de desvantaxe ou vulnerabilidade social.

As contías destas achegas oscilan entre os 2.909 e os 4.982 euros. No Concello de Lalín beneficiarán a Asociación Aspadeza, que desenvolverá un programa de respiro familiar; a Asociación Carabelo, para financiar un proxecto de apoio integral a familias en risco de exclusión; a Asociación de Familiares y Enfermos Mentales Morea, para abordar un programa de integración social de persoas con enfermidade mental grave e ás súas familias; a Asociación de Voluntariado O Mencer, para as actividades do colectivo e a Asociación para la Protección de los Ancianos de Lalín y su Comarca, que financiará as Olimpíadas As Dores.

Por outra banda, en Silleda son dous os colectivos beneficiados: a Asociación para o Desenvolvemento Social da Comarca de Deza, que poderá desenvolver a sétima edición do obradoiro práctico de motivación Encantado/a de Coñecerme e Cáritas Diocesana, para a atención de familias de Silleda e Lalín. E, no caso da Estrada, recibirá unha subvención a Asociación Galega para Axuda dos Enfermos con Demencia tipo Alzhéimer (Agadea), que poderá financiar un programa de estimulación cognitiva e psicomotriz para persoas con deterioro cognitivo.