Estas impartiranas profesionais da produción en Galicia, co obxectivo de achegar o alumnado dos últimos cursos de primaria ao audiovisual galego dun xeito didáctico, educativo e atractivo.

Longametraxes de ficción, documentais, curtametraxes, programas e outros recursos audiovisuais creados en Galicia poden utilizarse como instrumentos pedagóxicos para ensinar valores, historia, xeografía e lingua galega, ao tempo que permiten que as nenas e nenos entren en contacto coa nosa cultura.

Produtoras e produtores que participan nas xornadas

• Alba Prol (Meteórica) é directora do documental O gran Camiño e produtora executiva na empresa Meteórica. Acaba de estrear a segunda temporada dunha serie documental sobre viaxes que conta con distribución internacional e prevendas a diferentes canles europeas. Falará da súa experiencia como produtora para programas de televisión e series documentais.
• Mercedes García-Nieto e Mónica Hidalgo (M International) son fundadoras de M International Audiovisual, especializada na produción e venda de contidos audiovisuais propios e na coprodución internacional. Ambas as dúas contan cunha dilatada experiencia en produción para cinema e televisión. Comezaron a súa actividade en 2014 e nestes anos participaron na creación de series e especiais culturais. A súa principal clientela son as televisións autonómicas, nacionais e internacionais.
• Gael Herrera (Tamboura) é produtora executiva na empresa galega Tamboura Films, especializada en contidos para canles de televisión. Produciu numerosos programas coma Qué casas!, Escaparate ou Historias mínimas.
• Dani Froiz (Matriuska Producións) traballa desde 2005 na produtora independente Matriuska Producións como responsable da produción executiva de numerosos proxectos de cinema e audiovisual. Produciu máis de dez longametraxes de ficción, documentais e formatos de televisión. Tamén é cofundador do Festival Novos Cinemas de Pontevedra.
• Álvaro P. Becerra (Undodez) traballa desde 2010 no sector cultural en Galicia como produtor de contidos audiovisuais, escénicos e eventos, cunha traxectoria ligada a proxectos relevantes coma o regreso de Heredeiros da Crus, o éxito teatral de Somos criminais ou a serie Fariña. Cofundador das produtoras Ainé e Undodez, esta última centrada en ficción, televisión e animación en galego —na que destaca a serie Bibopalula—, tamén foi director de produción na TVG e actualmente compaxina a produción coa consultoría cultural.
• Simone Saibene (Noveolas) licenciouse en Ciencias da Comunicación na Universidade Libre de Lingua e Comunicación de Milán (Italia). De 2006 a 2010 traballou como programador e redactor de publicacións na Fundación Cultural San Fedele de Milán. En 2012 fundou en Ourense a produtora distribuidora Noveolas. Na súa filmografía destacan 9 ondas (2013), Pelerinaxes (2016) ou Escribir o imposible (2021), filmes que tiveron percorrido en festivais nacionais e internacionais e polos que recibiu distintos premios. Como docente e crítico de cine colaborou con diversos medios e institucións coma o Instituto Cervantes de Milán, a Universidade Nacional de Educación a Distancia, Onda Cero, a Universidade de Vigo ou o Consello da Cultura Galega. Desde 2019 dirixe e conduce o programa Cinephilia en Telemiño, que recibiu dous Premios Mestre Mateo, en 2021 e 2023, ao mellor programa de televisión, distintas mencións á mellor comunicador e á mellor realización, ademais do premio CREA, en 2022. Saibene tamén lidera o grupo musical grelos-western Os Forasteiros.