Galiexpo Motor Show consolídase, coa súa 18.ª edición, como un dos eventos de motor máis importantes do noroeste peninsular. Do 24 ao 26 de abril de 2026, o IFEVI de Vigo acollerá máis de 50.000 m² de exposición con vehículos, empresas do sector, pilotos nacionais e internacionais e público.
Un dos grandes atractivos deste evento é o campionato internacional de drift, que sitúa Pontevedra no circuíto global do motor. Como novidade, inclúese a actividade educativa “Xogade coas motos”, destinada a nenos de 6 a 14 anos, e que busca promover a seguridade, o respecto e a disciplina desde idades temperás.

Durante o evento terá lugar tamén o II Congreso Galiexpo Deputación de Pontevedra, con referentes do motor compartindo experiencias sobre superación e liderado. O evento goza de ampla difusión mediática, tanto en prensa, radio e televisión coma en redes sociais, o que o reafirma como unha cita de referencia europea e xera un impacto económico e turístico relevante para a provincia de Pontevedra.