Collía o tranvía para comprar nas tendas de Vigo tecidos, fíos, botóns, abelorios ou cremalleiras, ata que se decatou de que podía facer algo máis de negocio complementando a súa actividade de modista coa venda destes materiais de costura. Ao longo de décadas, o seu taller foi un referente de creatividade, de onde saían pezas para días especiais que eran pura artesanía. Coñecida pola súa xenerosidade, cosía tamén para familias humildes sen cobrarlles, e vestiu desde noivas ata defuntos. Superou un cancro linfático sen deixar de coser e chegou mesmo a rematar un vestido de noiva desde o hospital. Xa centenaria, hoxe é unha muller querida e popular á que lle gusta participar nos eventos da vila. En 2023 foi madriña do Negrita Festival; en 2024, pregoeira das Festas do Cristo; e neste 2025, no día do seu centenario, o Concello homenaxeouna poñéndolle o seu nome a unha rúa situada moi preto do taller ao que continúa acudindo cada día. Juaniña é memoria viva do Porriño; a súa enerxía, o sentido do humor co que afronta a vida e a vontade de manterse activa e independente mentres poida fan dela un símbolo de vitalidade e un exemplo para todas nós.