As e os deportistas de alto rendemento dedícanlle plenamente o seu tempo e enerxía a esta actividade, desenvolvendo atributos profesionais e persoais que transcenden o ámbito deportivo. Con todo, as esixencias de adestramentos intensivos, concentracións, competicións e continuos desprazamentos poden dificultar a conciliación con outras carreiras profesionais complementarias.

Consciente destas necesidades e co firme propósito de ofrecer o apoio necesario para que ningún talento da provincia quede freado, a Deputación de Pontevedra reforza o seu compromiso co deporte de alto nivel, considerado un dos alicerces estratéxicos da súa xestión. Por iso, amplía o seu apoio a través desta liña de axudas, co obxectivo de contribuír ao financiamento da actividade competitiva e á preparación técnica das e dos deportistas destacados da provincia que cumpran os requisitos establecidos.

Este apoio reforza a aposta provincial polo deporte como motor social, económico e de representación internacional e consolida Pontevedra como a provincia do deporte e como un referente no impulso ao talento deportivo.