A quen vai destinado o programa?

O programa está pensado para centros educativos públicos de concellos de menos de 50.000 habitantes da provincia nos que se impartan ESO, bacharelato e formación profesional básica. En cada centro, participarán na actividade:

• O alumnado: dous grupos de entre 25 e 30 persoas cada un, elixidos polo centro.
• O profesorado e o equipo de orientación.
• As familias e a anpa: preferiblemente as dos grupos participantes.

Contidos

O programa divídese en tres tipos de sesións, adaptadas a cada grupo:

• Sesións formativas co alumnado: un obradoiro interactivo de 10 horas de duración, distribuídas segundo as necesidades de cada centro.
  Poderán versar sobre algunha das seguintes cinco temáticas:
  • Autolesións, ideación suicida e pensamentos negativos e intrusivos.
  • Diversidade, imaxe corporal e trastornos da conduta alimentaria.
  • Acoso escolar (bullying), ciberacoso (ciberbullying) e mensaxes de odio.
  • Consecuencias do uso da pornografía e outras violencias sexuais.
  • Utilización de sustancias e conductas abusivas.
• Capacitación docente: unha serie de obradoiros de 4 horas para o profesorado e o persoal de orientación. O seu obxectivo é proporcionar ferramentas e coñecementos prácticos para a xestión do benestar emocional do alumnado.
• Intervención coas familias ou a anpa: un obradoiro de 2 horas no que se abordarán recursos para a prevención en materia de saúde mental no fogar.

Participación e prazos

O programa desenvolverase durante o curso 2027/2028 e prevese que comece no mes de setembro de 2027. O centro educativo terá a flexibilidade de distribuír as horas dos obradoiros, en coordinación coa entidade social encargada da xestión do programa e en función da súa dispoñibilidade.

As solicitudes poderán presentarse do 26 de outubro ao 4 de decembro de 2026, obrigatoriamente a través da Sede electrónica da Deputación de Pontevedra (https://sede.depo.gal/).