Inma López Silva

Novelista, ensaísta, crítica teatral e columnista de prensa, é autora dunha ampla obra literaria que foi recoñecida cos premios Xerais, Blanco Amor, San Clemente, Losada Diéguez e Francisco Fernández del Riego. Como narradora cultivou o xénero breve en libros coma Rosas, corvos e cancións (2000) e Tinta (2012), así como o ensaio feminista en New York, New York (2007), Maternosofía  (2013) e o polémico Chámame señora, pero trátame coma a un señor (2018). Tras o éxito de aclamadas novelas coma Memoria de cidades sen luz (2007) e Aqueles días en que eramos malas (2016), Galaxia publica en 2020 O libro da filla, premio da Asociación de Críticos Literarios, e en 2022, na colección Memoria Histórica, Quen non ten un avó fascista?

Antonio Garcia Teijeiro

(Vigo, 1952). Profesor, escritor e crítico de literatura infantil, obtivo o Premio Nacional de Literatura Infantil e Xuvenil en 2017. Foi galardoado co Premio Merlín por Na fogueira dos versos, entrou na lista de honra da Organización Internacional para o Libro Xuvenil (IBBY, polas súas siglas en inglés), e concedéuselle o Premio Pier Paolo Vergerio da Universidade de Padua (Italia), un dos máis prestixiosos de Europa. Co poemario Arredor do teu corpo gañou o Premio Illas Sisargas. Estes son só algúns dos moitos recoñecementos que atesoura. Algúns dos seus poemas foron musicados por grupos galegos e músicos coma Antón Seoane e Paco Ibáñez. Mantén unha intensa actividade na rede co seu blog Versos e aloumiños.

Foto del autor: © Anxo Cabada

Marta Dacosta

(Vigo, 1966). Comezou a publicar poesía na década dos oitenta a través de colaboracións en diferentes revistas; o seu primeiro libro publicouse en 1993. Recibiu o accésit do Premio Esquío e os premios González Garcés, Martín Codax, O Figurante e Johán Carballeira, entre outros. A súa obra foi recollida en antoloxías e traducida a varias linguas, e algúns dos seus poemas foron musicados ou incorporados a proxectos teatrais. Entre a súa obra poética destacan: Crear o mar en Compostela, Pel de ameixa, Setembro (Galaxia, 1998), En atalaia alerta, As amantes de Hamlet, Cinsa, Acuática alma, Argola, Dun lago escuro, Na casa da avoa (Galaxia, 2017), Labirinto ou memoria e Notas sobre a extinción (Galaxia, 2020).

Diego Giráldez

(O Porriño, 1976). Exerceu o xornalismo en distintos medios escritos e dixitais. Ademais de coordinar varias cabeceiras, colaborou como columnista de opinión nos xornais A Nosa Terra e Xornal de Galicia e, a través de reportaxes culturais, con El País. Na actualidade faino co diario dixital Praza Pública e coa revista Luzes. Fundou e dirixiu as revistas Malladoura e CanZine, e escribiu libros relacionados coa arquitectura e coa historia económica de Galicia. En 2016 publicou o libro de relatos curtos Galería de saldos, o seu primeiro traballo de narrativa, polo que foi elixido Autor Galego do Ano pola revista Fervenzas Literarias. En Editorial Galaxia publicou a novela Hotel para coleccionistas discretos (2019) e O meu sangue (2021), e participou nas obras colectivas O libro dos trens e A secreta melancolía da garza (Galaxia, 2019). Entre os galardóns que recibiu destacan o Premio Literario José Saramago de Relato Curto (2010), o primeiro accésit do Certame Nacional de Narracións Breves Modesto R. Figueiredo (2015) e o Premio Literario Manuel Murguía (2016). En 2020 quedou finalista do XVII Premio de Xornalismo Francisco Fernández del Riego.

Foto del autor: © Mateo H. Soto

Esther Carrodeguas

(Rianxo, 1979). Polifacética artista rianxeira que asenta o seu currículo vital entre as letras, o audiovisual e o teatro. A súa escrita máis persoal cabalga normalmente por riba dos lindes que separan os xéneros, de maneira que moitos dos seus textos resultan difíciles de clasificar. En 2016 recibiu o Premio Modesto R. Figueiredo, do Pedrón de Ouro, polo relato Subir o telón (Edicións do Castro, 2008), coa súa primeira publicación en solitario. Collage (Edicións Barbantesa, 2011) reafírmase nunha escrita fortemente persoal e poética. A partir de aí, a súa carreira profesional derivou cara ao teatro e publicou diversos textos (máis ou menos imposibles) na revista Núa, de artes escénicas. Graduouse en Dirección e Dramaturxia pola Escola Superior de Arte Dramática de Galicia en 2016, déixase notar a súa formación previa como xornalista, non só na súa colaboración habitual na Revista Galega de Teatro, senón, sobre todo, no seu teatro, que, aínda que é moi poético, nace en realidade dunha necesidade vital de investigación. Deste xeito naceu Na butaca, pero tamén a premiada Voaxa e Carmín (Difusora de Artes, Letras e Ideas, 2016 e premio Abrente de Textos Teatrais 2015). Na actualidade dirixe, xunto a Xavier Castiñeira, a compañía teatral ButacaZero.