Un proxecto da Fundación Penzol e da Deputación de Pontevedra

Comisariado: Mercedes Queixas Zas

O 16 de maio de 2015 a poeta viguesa María do Carme Kruckenberg iniciaba a derradeira viaxe de despedida do seu Vigo natal, vivencial e emocional.

“A onde fun, tornei a Vigo”, declara o seu verso lúcido para o que foi punto cardinal de saída e sempre desexado retorno dunha intensa biografía persoal e literaria que abrangue, como referente, a maioría do século xx e o saúdo da centuria actual.

A escritora permanece en nós grazas ao legado da súa importante produción literaria, inicialmente creada en castelán e en galego, para se expresar de xeito monolingüe en galego a partir da década dos anos setenta en máis dunha trintena de obras líricas, así como incursións no eido da tradución e da narrativa.

O corpus lírico de María do Carme Kruckenberg ofrece un percorrido único por un vieiro moi persoal no proceso colectivo de construción da poesía galega desde a posguerra, desde a herdanza poética do noso cancioneiro medieval ata o existencialismo, erguendo a voz da denuncia social ou convocando o erotismo máis sensorial.

Por expreso desexo da poeta, este legado literario está depositado, para a súa custodia e consulta, no arquivo da Fundación Penzol. Desde esta institución enténdese preciso render unha homenaxe de lembranza á autora para maior recoñecemento público dunha escritora de noso, lúcida e pioneira, que deixou inserido no corpo de miles de versos un ronsel de vida para a esperanza.

Con tal motivo, desde a Fundación Penzol e como adoitamos facer con outras persoas salientables da cultura galega ligadas á nosa fundación, suxerimos a elaboración dunha mostra divulgativa para poñer en valor esta figura pioneira entre as escritoras galegas de posguerra e mais a súa meritoria actividade literaria, incesante ao longo do seu rico percorrido vital. Esta mostra está dirixida a un amplo público de todas as idades e estará instalada inicialmente en Vigo, a súa cidade natal á que, como xa sinalamos, tan ligada estivo sempre.

A exposición está comisariada pola docente e escritora Mercedes Queixas Zas, quen, alén doutros probados méritos, na competencia que aquí nos ocupa é unha das principais especialistas na homenaxeada, autora de Vivir, unha aventura irrepetíbel. Biografía de María do Carme Kruckenberg (Galaxia, 2011), así como editora literaria doutras obras da escritora. Ademais, por parte da Fundación Penzol, contará coa colaboración de dúas persoas do seu Padroado (Malós Cabrera e Xosé Manuel Soutullo), así como co persoal técnico da Casa Galega da Cultura, sede da Fundación Penzol, onde está depositada a doazón a favor desta institución que, en 2015, realizou a súa herdeira, Cristina Pusone Kruckenberg, dun importante fondo documental pertencente á escritora. Os seus elementos de maior relavancia tamén se presentarán na mostra.

FICHA TÉCNICA

ACTIVIDADES

RECITADO HOMENAXE A MARÍA DO CARME KRUCKENBERG
9 de novembro, ás 19:30 h
Sala Rosalía de Castro – Sede da Deputación en Vigo
Confirmación de asistencia en participa.cultura@depo.es
Poetas participantes: Silvia Penas, María Lado, Elvira Ribeiro e Miriam Ferradáns

 

Silvia Penas (Vigo, 1980) é poeta, performer e creadora. O seu traballo ten como punto de partida a escrita de textos, cunha forte vocación por indagar na poesía escénica e noutros formatos de poesía volátil ou efémera. Os seus proxectos tamén se centran na experimentación arredor da fusión da poesía con outras disciplinas artísticas. Xunto co músico e videocreador Jesús Andrés Tejada creou o dúo en activo de poesía escénica, música e videoarte Cintaadhesiva. Publicou cinco libros de poesía: Biografía da multitude; As uñas crecen; Diario de ladras, bailarinas, asasinas e flores; Fronteira Paraíso; y O resto é céu; varios deles premiados en diferentes certames.

 

 

 

María Lado (Costa da Morte, 1979) é poeta, dramaturga, actriz e moitas cousas máis. Empezou a escribir no colectivo Batallón Literario da Costa da Morte co seu primeiro poemario individual en 1997. É autora de sete libros de poemas: A primeira visión; Casa atlántica, casa cabaret; Berlín; Nove; Amantes; Oso, mamá, si?; e Gramo Stendhal. Xunto con Iria Pinheiro publicou Uralita e con Lucía Aldao, Ninguén morreu de ler poesía. Os seus textos incluíronse tamén en numerosas antoloxías e volumes colectivos e en revistas especializadas. Ademais, escribiu contos infantís, novela, guións e textos teatrais. Desde 2005 forma parte do dúo poético Aldaolado con Lucía Aldao.

 

 

 

Elvira Ribeiro (Pontevedra, 1971) é poeta con algunhas incursións na narrativa, na poesía escénica e na videocreación. Publicou, entre 2005 e 2017, seis libros de poesía para persoas adultas, varios deles premiados: Andar ao leu, Arxilosa, Biografía da multitude, Carnia haikai, Corpos transitivos e Welcome to Sing Sing; e, entre 2008 e 2017, outros tres dirixidos á rapazada: pAlAbrAs brAncAs, As redes de Inés e Maruja Mallo. Os seus textos tamén se incluíron en diversas antoloxías e volumes colectivos e en revistas especializadas. Formou parte do proxecto de poesía e música electrónica Tristecentos versos xunto con Carina Posse, Silvia Penas e Xabier Xil Xardón.

 

 

 

Míriam Ferradáns (1982, Bon, Bueu, Pontevedra). Poeta, columnista e autónoma no Ensino Medio. Como poeta publicou a plaquette Deshabitar unha casa (2016), Premio de Poesía Francisco Añón;  Nomes de fume (2017), Premio Nacional de Poesía Xosé María Pérez Parallé (publicado en catalán, en edición bilingüe, en 2019, por Godall Edicions, traducido pola poeta Dolors Miquel);  e Agosto (2019). Participou en diversas obras colectivas e os seus poemas forman parte de antoloxías e de revistas especializadas. Con “Do tacto”, poemario breve recollido na obra colectiva Roseira de cen Follas (2019), recibiu o Premio de Poesía Leiras Pulpeiro.