A Deputación de Pontevedra, a través de SmartPeme, oferta esta semana cinco novas accións formativas impartidas de xeito online, enmarcadas na carteira de obradoiros que se imparten de forma telemática. As accións tratarán temas como o e-mail márketing, o blockain e as criptomoedas ou os podcast.

Os obradoiros comezan este luns da man de Manuel Freire, experto universitario en robótica, que explicará o “Blockchain, que é e como funciona”. Con este taller dará inicio unha serie de catro obradoiros informativos que teñen en común a tecnoloxía blockchain. Para o martes SmartPeme ten programada unha sesión titulada “Audio márketing: crea e diferénciate da competencia cos podcast” na que Laura Carrera, graduada en Publicidade e Relacións Públicas, falará sobre os beneficios, formatos e casos de éxito destas publicacións.

O xoves Fátima Faílde, licenciada en Publicidade e Relacións Públicas, será a encargada de impartir o obradoiro “Crea unha campaña de email márketing con Mailchimp”. Nel as persoas asistentes coñecerán esta ferramenta e aprenderán a crear un formulario e deseñar unha campaña de email márketing.

Para o xoves hai dous obradoiros preparados. O primeiro deles titúlase “Así funciona WhatsApp business” e será impartido por José Luis Taboada, enxeñeiro informático, e nel daranse a coñecer as claves desta ferramenta. A semana rematará con outro obradoiro de Manuel Freire sobre “Blockchain e criptomoedas” no que explicará en que consiste a tecnoloxía do blockchain e como grazas a ela estamos ante o que se chama o internet con valor.