Sistema integral de monitorización de cultivo mediante o uso de tecnoloxías IoT de baixo custo e intelixencia artificial para a mellora da xestión e optimización do kiwi en Galicia

• Acronimo:

  KIWI-SENS

• Programa:

  Programas de desenvolvemento rural (PDR) de Galicia 2021-2027

• Convocatoria:

  Axudas para executar proxectos innovadores dos grupos operativos da Asociación Europea da Innovación (AEI), convocatoria de 2024

• Fondos:

  FEADER

• Órgano responsable:

  Axencia Galega da Calidade Alimentaria (AGACAL)

• Socios:

  Kiwi Atlántico

  Colaboradores: CIAM, ENCORE LAB e CESENS

O obxectivo xeral é dixitalizar o cultivo de kiwi en Galicia para que as e os kiwicultores conten con novas ferramentas e estratexias para optimizar a xestión agronómica das explotacións, a través do uso de tecnoloxías IoT (Internet of Things) de baixo custo e intelixencia artificial. Os obxectivos son:

• Implementar unha nova metodoloxía de rega, baseada en información cuantitativa sobre o ambiente edafoclimático e o propio cultivo, orientada a maximizar os rendementos e a facer un uso eficiente do recurso hídrico dispoñible nas condicións locais.
  Así, búscase identificar os parámetros máis adecuados sobre os que basear as estratexias de manexo, seleccionar e configurar adecuadamente os dispositivos encargados de capturar a información e, en consecuencia, establecer unhas consignas obxectivas para xestionar o sistema de irrigación.
• Desenvolver unha ferramenta fiable para a predición de risco da bacteria psa, de maneira que sexa posible incrementar a eficacia das medidas de control ou prevención utilizadas e diminuír a afección. Tamén se procura esclarecer o impacto dos novos sistemas de plantación sobre as condicións microclimáticas que favorecen a incidencia desta patoloxía.
• Poñer á disposición do sector un sistema de alertas e seguimento específico para o kiwi en aspectos tan relevantes coma a polinización ou as xeadas, de maneira que se proporcione información en tempo real para maximizar o impacto das actuacións correspondentes (sistemas activos de loita contra xeadas, introdución de colmeas, polinización manual etc.).