#CULTURA
“UTOPÍAS”
CONSIDERACIÓNS DUN NOVO ESPAZO EXPOSITIVO
Sala Maruja Mallo da sede da Deputación en Vigo
Inauguración: mércores 15 de abril , ás 19 h
Do 15 de abril ao 26 de xuño de 2026
Horario de visita: de luns a venres, de 9.00 a 20.30 h
“Utopías” é unha exposición multidisciplinar que invita a quen a visita a introducirse nun espazo de reflexión construído a partir de tres miradas artísticas que dialogan entre si. A través de distintas linguaxes —visuais, conceptuais e emocionais—, o proxecto propón un percorrido aberto que transcende o puramente contemplativo.
Exponse a utopía como ideal e como anhelo colectivo, pero tamén como un territorio complexo atravesado polas súas propias contradicións. Lonxe de entendela unicamente como un horizonte perfecto, “Utopías” pon en evidencia as tensións que a habitan: a procura de equilibrio entre perfección e erro, entre control e liberdade, entre o imaxinado e o posible.
Neste contexto, as obras non ofrecen respostas pechadas, senón que funcionan como dispositivos de pensamento. Cada peza abre unha fisura desde a que observar a realidade, revelando tanto os desexos de transformación coma as incertezas e fraxilidades que definen a condición humana. O íntimo e o colectivo entrelázanse, xerando un espazo onde as experiencias individuais atopan resonancia no común, tensións entre perfección, control e liberdade.
O percorrido expositivo configúrase como unha paisaxe emocional no que luces e sombras conviven, reflectindo as nosas decisións, aspiracións e límites. A ou o visitante non ocupa un lugar pasivo, senón que é invitado a implicarse, a cuestionar a súa propia mirada e a reconstruír o sentido do que observa nun espazo de introspección, compromiso e conciencia crítica. Un lugar onde non hai refuxio na neutralidade e onde cada visitante forma parte activa do relato que se desprega.
OBRADOIROS
Venres 17 e 24 de abril e 8 de maio, de 18 a 21 h.
Sede da Deputación en Vigo (rúa de Eduardo Chao, 17)
Inscrición: participa.cultura@depo.gal
Impartidos por Rosa García, Cristina Fernández Núñez e Eva Tarrío.
Ler máis →ARTISTAS
-
Rosa García
Rosa García
Rosa García é licenciada en Belas Artes; máster en Investigación en Artes Visuais e Educación pola Universidade de Barcelona e máster en Creatividade pola Universidade de Santiago de Compostela.
A súa actividade artística compártea coa de docente na Escola de Artes e Oficios de Vigo, onde ensina escultura-talla e gravado. Desde 1994 colabora co Grupo Musaraña na área de educación do Museo Nacional Thyssen Bornemisza de Madrid.
Participou en numerosas exposicións colectivas e individuais e feiras de arte en España e Europa, así como en proxectos artísticos e culturais. A súa obra foi seleccionada en distintas edicións de certames coma o Certame Nacional de Arte Gráfica para xoves creadores da Real Academia de Belas Artes de San Fernando; o Certame da Calcografía Nacional da Casa da Moeda de Madrid; o Certame MAPAMA do Ministerio de Agricultura e Pesca, Alimentación e Medio Ambiente do Goberno de España; o Certame Novos Valores da Deputación de Pontevedra; o Certame Premios Nacionais de Gravado da Fundación do Museo do Gravado Español Contemporáneo, onde en 2018 acadou o Premio María Teresa Toral á produción de obra gráfica; a Bienal Internacional de Arte de Cerveira (Portugal); a Exposición Internacional de Artes Plásticas de Valdepeñas (Ciudad Real, España); a Bienal Iberoamericana de Obra Gráfica Ciudad de Cáceres ou o Premio Atlante de Gravado, no que recibiu unha mención de honra en 2024 e o Premio Galicia en 2025.
-
Eva Tarrío
Eva Tarrío
Vigo, 1972. Doutora en Belas Artes pola Universidade de Salamanca.
Traballou durante anos coordinando e comisariando exposicións xunto a Antón Castro en Galicia, en cidades como Vigo, Pontevedra, A Coruña, Santiago e Ourense, ademais de Alemaña e Francia. Destaca a coordinación do proxecto da Illa das Esculturas de Pontevedra. Paralelamente, como artista, realizou exposicións de escultura, pintura, gravado e instalacións tanto en Galicia como fóra do país: en Alemaña, Francia ou Portugal, entre outros.
En maio de 2023, a cidade de Vigo encárgalle unha obra pública, situada na avenida Castelao, O mar habitado.
En decembro de 2024 comisaría a primeira edición de VARCO, Vigo Arte Contemporáneo, que resultou ser un éxito como primeiro proxecto feiral para a exposición e venda de arte contemporánea, no que se aposta ademais por artistas emerxentes en Galicia
Realizou exposicións colectivas (en Vigo, Porto, Pontevedra) e individuais, coma a súa ampla mostra de escultura Nas marxes do diario, en outubro e novembro de 2025 na sala 1 de Afundación en Vigo.
En decembro de 2025 repetiu co comisariado e publicación do catálogo na segunda edición de VARCO, cuxo proxecto se amplía ao noroeste Atlántico, na que se incorporan artistas de Portugal e que se repetirá anualmente.
-
Cristina Fernández Núñez
Cristina Fernández Núñez
Cristina Fernández Núñez (Vigo) é licenciada en Belas Artes pola Universidade Complutense de Madrid (1989–1994). Desde 1995 compaxina o seu labor docente como profesora de debuxo e pintura co desenvolvemento da súa práctica artística, consolidando unha traxectoria coherente e persoal centrada na exploración da percepción, o tempo e a relación entre o visible e o oculto.
A súa obra articúlase ao redor dunha constante reflexión sobre a orde e o caos, así como sobre os límites da mirada. A través de imaxes que evocan paisaxes en movemento, Fernández Núñez investiga a fugacidade do instante, tratando de capturar ese tempo mínimo e efémero que transcorre case imperceptible, coma se fose observado desde a fiestra dun tren. A paisaxe, recorrente na súa produción, aparece esvaecida, case abstracta, convértese nun espazo de tránsito onde a luz, a sombra e a memoria dialogan continuamente.
En paralelo, a artista desenvolveu unha liña de traballo centrada na arquitectura, abordada como un diario privado. Nestas obras, os edificios son representados frontalmente, salientando os contrastes entre luz e sombra, e subliñando a presenza da orde estrutural. Este interese desemboca na serie Sombras Visibles, na que, durante máis dunha década, traballou a partir das sombras proxectadas de plantas sobre o lenzo. Estas siluetas, reducidas a dous planos —figura e fondo—, xeran composicións depuradas que en ocasións se ven atravesadas por textos e introducen novas capas de significado.
Neste contexto, o compoñente conceptual e simbólico adquire especial relevancia, especialmente en relación coa representación do feminino. En series como Beguinas, os títulos orientan a lectura da obra, mentres que en pezas como Camille, o texto se integra directamente na imaxe. Nos seus traballos máis recentes, a artista dá un paso máis aló ao dotar de corporeidade esas sombras previamente planas, transformándoas en retratos máis definidos, onde a luz revela progresivamente aquilo que antes permanecía oculto.
A obra de Cristina Fernández Núñez foi seleccionada en diversos certames e exposicións, entre eles Valdepeñas (2017, 2018 e 2019), o Parlamento da Rioxa, a bienal da Comisión Europea en Bruxelas, a bienal de Cangas de Morrazo, así como exposicións vinculadas a institucións coma o IVAM ou o Museo de Alcalá de Guadaíra.
Ao longo da súa carreira colaborou con galerías como Alameda (Vigo), José Lorenzo (Santiago de Compostela), Ansorena (Madrid) e Dua2 (Vigo), onde presentou principalmente exposicións individuais. Na actualidade está representada pola galería Dupla en Santiago de Compostela, espazo no que continúa desenvolvendo e mostrando os seus proxectos máis recentes, tanto individuais coma colectivos.
Novas relacionadas
{"classPK":15901534,"groupId":"37861","name":"20263005_ampliacion_expos_vigo.jpg","alt":"AMPLIACION EXPOSICIONS VIGO ","title":"20263005_ampliacion_expos_vigo.jpg","type":"document","uuid":"204acbce-1775-9478-aceb-e9d31410618b","fileEntryId":"15901534","resourcePrimKey":"15901550"}
A Deputación amplía o prazo das exposicións ‘Utopías’ e ‘Rosalía Ilustrada’ na sede de Vigo ante o éxito de público
30/05/2026
{"classPK":15184053,"groupId":"37861","name":"20261504_inauguracion_expo_utopias_03.jpg","alt":"Luisa Sánchez","title":"20261504_inauguracion_expo_utopias_03.jpg","type":"document","uuid":"63d21451-8fd0-cc12-44fc-79a25166767b","fileEntryId":"15184053","resourcePrimKey":"15184096"}
A Deputación de Pontevedra inaugura en Vigo a mostra ‘Utopías’, unha proposta artística que convida a reflexionar sobre o conflito entre o ideal e o factible
15/04/2026