A Xunta de Goberno da Deputación de Pontevedra acaba de subvencionar por preto de 650.000 euros o proxecto de urbanización da rúa Condesa e áreas de estacionamento en Barrantes, no concello de Ribadumia. Para acometer esta actuación, a Deputación achega o 70 % do orzamento, mentres que o Concello achega o 30 % restante.

Como explicou o presidente provincial, Luis López, esta obra abrangue un tramo duns 300 metros no treito inicial da EP-9506 que une Barrantes e Vilariño, e transformará o núcleo urbano, permitindo mellorar a seguridade viaria e a mobilidade da veciñanza. En concreto, mediante a actuación modificarase o trazado da rúa Condesa e instalaranse beirarrúas máis amplas, de formigón coloreado. Tamén se crearán zonas de estacionamento para darlles servizo aos autobuses escolares que acceden ás instalacións deportivas da contorna e construirán pasos de peóns sobreelevados para garantir a seguridade viaria.

As obras completaranse coa instalación de redes de telecomunicación e de drenaxe, así como coa execución de zonas axardinadas, mobiliario urbano e nova sinalización horizontal e vertical.