Luis López confirma que a Xunta de Goberno da Deputación acaba de aprobar o convenio de colaboración co Concello de Tomiño para investir máis de 710.000 € na mellora da estrada provincial EP-3303 Tabagón-Goián. A través deste convenio, o organismo provincial comprométese a achegar o 80% dos recursos, preto de 570.000 €, e o Concello de Tomiño o 20% restante, 142.000 €.

Tal e como informou o presidente, este convenio vai dar continuidade ás actuacións desenvolvidas noutros dous tramos desta estrada provincial. Deste xeito, o obxectivo principal da actuación é mellorar as condicións de seguridade e mobilidade para os peóns mediante a construción dun itinerario peonil accesible desde o punto quilométrico 3+600 ata o 4+542.

Ao detalle, López informou que entre os puntos quilométricos 3+600 e o 4+446 se modificará a sección da estrada e se creará un carril peonil e ciclista. Ademais, no treito máis urbano e con maior grao de consolidación da edificación, sen espazo suficiente como para a modificación da sección da calzada, executarase unha zona de convivencia de prioridade peonil. Finalmente, a actuación completarase coa instalación de redutores de velocidade, a renovación da rede de drenaxe, a execución da canalización soterrada e a instalación de novo alumeado.

videos

audios