O grupo Luar na Lubre ofrecerá na noite deste martes 1 de agosto un concerto en Cambados, no marco das celebracións da LXXI Festa do Albariño. A actuación, que terá lugar ás 22:30 horas na Praza de Fefiñáns, celébrase ao abeiro do programa provincial Musigal, posto en marcha pola Deputación para contribuír á difusión e promoción da música galega e en galego nos concellos da provincia e fomentar o uso e a normalización social da lingua.

A formación galega Luar na Lubre presentará no concerto “Vieiras e vieiros, historias de peregrinos”, o traballo discográfico número 19 do grupo, un álbum que visualiza a pegada artística, cultural e natural do Camiño de Santiago a través das historias dos peregrinos. Neste traballo, o grupo pon en valor a banda sonora dos territorios polos que transita o itinerario xacobeo, que abrangue lugares do Cebreiro, A Fonsagrada, a Costa da Morte ou a propia cidade de Compostela. Así, o disco inclúe sonoridades propias e músicas tradicionais que estiveron sempre moi ligadas e presentes nesta ruta.

Luar na Lubre naceu en 1986 co obxectivo de desenvolver, impulsar e dar a coñecer a música e a cultura galegas. Despois de tres décadas de traxectoria, con 19 discos publicados e máis de 1.500 concertos en 30 países de todo o mundo, o grupo é unha referencia internacional da música de raíz, cun traballo centrado desde os seus inicios no universo folk. Desde a publicación de “O son do ar” (1988), tema do que chegou a facer unha versión Mike Oldfield, o grupo procurou o seu propio estilo, tendo sempre como inspiración primaria a música galega. Un labor que se reflicte en todos e cada un dos discos publicados ata o momento pola agrupación liderada por Bieito Romero.