Este Nadal volvemos a mirada cara ao interior. Pousamos a vista nos nosos montes, fragas, vales, prados, ríos e aldeas, en toda a riqueza natural que crea e evoca esta terra. Detemos a mirada no patrimonio tecido e fabricado ao longo dos séculos. E reparamos nas actividades agrícolas e gandeiras, nas tradicións e lendas, nas festas e nunha gastronomía exquisita e única.

Este Nadal sae do noso interior. Nos bosques galegos feridos polo lume abrolla de novo a natureza con toda a súa forza e beleza, mentres que nas vilas do rural da provincia de Pontevedra se mantén o carácter hospitalario e acolledor das nosas xentes, que forxan o futuro desta terra cada día.

O espírito do interior impregna estas festas na Deputación de Pontevedra. Convidámoste a vivilas e a acompañarnos, a descubrir os 61 concellos deste territorio único no tránsito cara ao ano que chega. E desexámosche, coa forza do noso interior:

Feliz Nadal