O proxecto de posta en marcha da Oficina Tecnolóxica de Asistencia aos Concellos (OTAC) da provincia de Pontevedra por parte da Deputación provincial é unha iniciativa mediante a cal esta institución tenta cumprir de forma eficiente co seu compromiso de apoio técnico aos concellos. Mediante esta oficina tecnolóxica, a Deputación de Pontevedra pretende centralizar e canalizar todos os servizos e as accións de soporte e asistencia aos concellos relacionados coas novas tecnoloxías, concretamente os referidos ás tecnoloxías da información e da comunicación (TIC).
Os destinatarios dos servizos que se recollen a continuación son os concellos de menos de 50.000 habitantes da provincia de Pontevedra.
Adecuación dos portais web
Servizo destinado ao deseño, á renovación e ao mantemento dos portais web municipais. Inclúese a adaptación técnica necesaria para garantir que estes cumpran coas normativas vixentes en accesibilidade, transparencia e protección de datos e promovan unha xestión sinxela e autónoma dos contidos.
Asesoramento e soporte na infraestrutura TIC
Servizo destinado a implementar e xestionar a infraestrutura tecnolóxica básica do concello, incluídos servidores, redes, almacenamento de datos, solucións na nube e sistemas de apoio que dean resposta e orientación nas consultas que xurdan.
Control horario
Servizo integral destinado ao control horario e seguimento da xornada laboral do persoal empregado público municipal. Inclúe sistemas dixitais avanzados para o rexistro horario adaptados ás esixencias legais e normativas vixentes.
Estandarización do posto de traballo dixital
Servizo orientado a implantar e xestionar escritorios remotos, como solución estandarizada para os postos de traballo municipais, que faciliten o acceso seguro e sinxelo ás aplicacións e aos recursos do concello desde calquera localización e aseguren a homoxeneidade tecnolóxica.
Impresión e dixitalización
Servizo integral que ofrece solucións eficientes para a xestión da impresión, copia e dixitalización documental nos concellos. Inclúe a provisión, a configuración e o mantemento continuo de equipos multifuncionais, optimizando recursos mediante sistemas avanzados de monitorización e control de custos.
Mantemento e infraestruturas TIC
Servizo de xestión, mantemento e supervisión das infraestruturas tecnolóxicas do concello, no que se inclúen centros de datos, redes, cablaxe estruturada, sistemas de alimentación ininterrompida e espazos técnicos. Garántese a dispoñibilidade, continuidade e seguridade dos recursos TIC.
Software de la Policía local
Servizo orientado a apoiar os concellos na dotación e mellora de ferramentas dixitais específicas para a Policía local. Inclúe solucións para tramitar denuncias, controlar o tráfico, xestionar vehículos, comunicacións e interoperabilidade con outras administracións.
Administración electrónica
Servizo destinado a implantar, optimizar e darlles soporte ás ferramentas de Administración electrónica municipal, e orientado a tramitar expedientes, xestionar notificacións, intercambiar datos con outras administracións e ofrecer servizos en liña áxiles, seguros e interoperables para a cidadanía en modo de software como servizo (SaaS, polas súas siglas en inglés).
Corrección de exames
Servizo destinado a prestar soporte na realización dos procesos selectivos nos concellos mediante o apoio na organización das probas e na corrección dos exames, coa elaboración da documentación precisa e o desprazamento do persoal técnico.
Padrón municipal de habitantes
Servizo dirixido a apoiar os concellos na xestión do padrón municipal de habitantes, asegurando o cumprimento da normativa vixente e a interoperabilidade co Instituto Nacional de Estatística (INE). Inclúe solucións técnicas e acompañamento funcional para manter un padrón actualizado.
Xestión de espazos municipais
Servizo de xestión dixital da reserva e uso de instalacións municipais coma pavillóns, centros culturais, aulas, pistas deportivas, venda de entradas, entre outros, para mellorar a dispoñibilidade dos espazos públicos e a atención cidadá mediante sistemas en liña e automatizados.
Soporte na redacción de pregos técnicos
Servizo de asesoramento especializado na redacción de pregos técnicos para contratacións relacionadas co ámbito tecnolóxico. Búscase garantir que os expedientes se axusten á normativa vixente e inclúan requisitos técnicos adecuados para favorecer unha contratación pública eficiente, segura e transparente.
Soporte para a avaliación das ofertas
Servizo de asesoramento especializado para avaliar as ofertas presentadas en procedementos de contratación de servizos e solucións tecnolóxicas. O obxectivo é garantir unha análise rigorosa e obxectiva que axude a seleccionar a proposta máis axeitada.
Centro de operacións de ciberseguridade para entidades locais
Servizo orientado a mellorar a protección dos sistemas municipais mediante a implantación progresiva dun centro de operacións de ciberseguridade a través do cal proporcionar ferramentas e servizos especializados para anticipar, detectar, protexer e responder ante incidencias, adaptado ao nivel de madurez de cada entidade local.
Estratexia de IA e casos de uso
Servizo de apoio para a definición dunha estratexia de intelixencia artificial aplicada á Administración pública local e a posta en marcha progresiva de casos de uso de IA, garantindo un uso ético, seguro e orientado á mellora dos servizos públicos.
Explotación e análise de datos
Servizo de apoio para desenvolver unha estratexia de análise de datos, identificando os datos dispoñibles no concello e asesorando na implantación dos casos de uso identificados, como, por exemplo, cadros de mando que faciliten a toma de decisións baseada en datos.
Plan provincial de adecuación ao ENS
Servizo orientado a apoiar os concellos no proceso de adecuación ao Esquema Nacional de Seguridade (ENS), no que se establecen os principios e requisitos necesarios para garantir a seguridade da información e dos servizos dixitais públicos.
Simplificación de procedementos administrativos
Servizo de apoio para a análise, homoxeneización, simplificación, dixitalización e automatización de procedementos administrativos dos concellos, orientado a eliminar tarefas manuais, reducir tempos de tramitación e mellorar a eficiencia interna mediante o uso de ferramentas dixitais.
Identificación e captación de fondos
Servizo de apoio especializado aos concellos da provincia na identificación, planificación e captación de fondos autonómicos, estatais e europeos. Inclúe a definición dunha estratexia de financiamento coordinada a nivel provincial.